މިދިޔަ އާދީއްތަ ދުވަހުގެ ދަންވަރުގެ ވަގުތެއްގައި ގެއިން ނެރެލި ތިން މައިން ދައުލަތުގެ ބެލުމުގެ ދަށަށް ގެންގޮސްފިއެވެ.
ހަތަރު އަހަރުގެ ފިރިހެން ކުއްޖަކާއި ހަތް އަހަރުގެ އަންހެން ކުއްޖެއް ގޮވައިގެން ދިރިއުޅެމުން ދިޔަ އެކަނިވެރި މައެއް ކަމަށްވާ އެ އަންހެން މީހާ އާއި ކުދިން، ތަކެއްޗާ އެއްކޮށް މަގުމަތިކޮށްލާފައިވާ ފޮޓޯތަކެއް އާދީއްތަ ދުވަހު ވަނީ ސޯޝަލް މީޑިއާގައި އާންމުވެފައެވެ.
ކުލީ ކޮޓަރިއެއްގައި ދިރިއުޅެމުން ދިޔަ އެ ތިން މައިންނަށް އެހީތެރިވެދިނީ މައިންނަށް އެހީތެރިކަން ފޯރުކޮށްދޭ ޖަމިއްޔާ އެއް ކަމަށްވާ މަމްސް އެއިޑުންނެވެ.
ޖެންޑާ މިނިސްޓްރީން އޭރު ބުނީ، އެ ތިން މައިން ގެއިން ނެރެލި މައްސަލަ އެ މިނިސްޓްރީ އަށް ހުށަހެޅުމާ ގުޅިގެން، އެ ތިން މައިން ދިރިއުޅޭ ތަނަށް ގޮސް ހާލު ބަލައި، އެހީތެރިކަން ފޯރުކޮށްދީފައިވާ ކަމަށެވެ.
ފޭސްބުކްގައި ކުރި ޕޯސްޓެއްގައި މަމްސް އެއިޑުން ބުނީ، އެ ތިން މައިންނަށް އެ ޖަމިއްޔާ އިން އެހީތެރިކަން ފޯރުކޮށްދެމުން ދަނިކޮށް، ޖެންޑާ މިނިސްޓްރީން އެ ތިން މައިން ކުއްލި ގޮތަކަށް އެ މިނިސްޓްރީގެ ބެލުމުގެ ދަށަށް ގެންގޮސްފައިވާ ކަމަށެވެ. މަމްސް އެއިޑުން ބުނި ގޮތުގައި، އެ ތިން މައިން ޖެންޑާ މިނިސްޓްރީން ނަގާފައި ވަނީ ވަގުތީ ރައްކާތެރިކަން ފޯރުކޮށްދޭ ޕްރޮގްރާމެއްގައި ބައިވެރިކުރުވުމުގެ ބޭނުމުގައެވެ.
މަމްސް އެއިޑުން ބުނި ގޮތުގައި:
- އެކި މީހުންގެ އެހީތެރިކަމާ އެކު 164،730 ރުފިޔާ ލިބިފައިވޭ
- ޖެންޑާ މިނިސްޓްރީން އެ ތިން މައިން ނަގާފައިވީ ނަމަވެސް، އެ ތިން މައިންގެ ހަރަދުތައް މަމްސް އެއިޑުން ބަލަހައްޓަމުން ދާނެ
- ޖެންޑާގެ ޕްރޮގްރާމް ނިމި، އެ ތިން މައިން އަނބުރާ މުޖުތަމައަށް ނުކުތުމުން، ހުރިހާ ކަމެއް ވެސް ކުރާނީ އެ ޖަމިއްޔާގެ އެހީތެރިކަމާ އެކުގައި
މަމްސް އެއިޑުން ވަނީ އެ ތިން މައިންނަށް އެހީތެރިކަން ފޯރުކޮށްދިން ކަމަށްޓަކައި އާންމުންނަށް ޝުކުރު އަދާކޮށްފައެވެ.
