މިދިޔަ އަހަރުގެ ތެރޭ ބޮޑެތި ކުރިއެރުންތައް ހޯދާފައި ވާނެ ކަމަށާއި، ފަސިންޖަރުންނާއި އެއާޕޯޓް ބޭނުންކުރާ ފަރާތްތަކަށް ލުއިފަސޭހަކޮށްދިނުމުގެ ގޮތުން، ވެލާނާ އެއާޕޯޓުގެ ވަސީލަތްތައް އިތުރަށް ހަރުދަނާކުރުމުގެ މަސައްކަތް ކުރަމުންދާ ކަމަށް، ވެލާނާ އެއާޕޯޓު ބަލަހައްޓާ އެމްއޭސީއެލުން ބުނެފިއެވެ.

ރާއްޖޭގެ އެންމެ ދުވަސްވީ އެއް ވައިގެ ބަނދަރަށް މިއަދު 57 އަހަރު ފުރުމާ ގުޅިގެން އެކަން ފާހަގަކޮށް ނެރުނު ނޫސްބަޔާނެއްގައި އެމްއޭސީއެލުން ބުނީ، ވޭތުވެދިޔަ އަހަރު ދުވަހުގެ ތެރޭ ވެލާނާ އިންޓަނޭޝަނަލް އެއާޕޯޓުގެ ހިދުމަތްތަކާއި ވަސީލަތްތައް ރަނގަޅުކޮށް، ބޮޑެތި ކުރިއެރުންތައް ހޯދާފައިވާނެ ކަމަށެވެ.

އެމްއޭސީއެލުން ފާހަގަކުރާ ގޮތުގައި، މި ފަހުން އަލަށް ހުޅުވުނު ރަންވޭ އާއި ނޫވިލު ސީޕްލޭން ޓާމިނަލްގެ ސަބަބުން ވެލާނާ އެއާޕޯޓުގެ ހިދުމަތްތަކަށް ބޮޑެތި ކުރިއެރުންތައް އައިސްފައިވެއެވެ. އެއާޕޯޓުގެ ހިދުމަތްތައް އިތުރަށް ތަރައްގީކުރުމުގެ ގޮތުން، އާ ވިއައިޕީ އިމާރާތުން ހިދުމަތްތައް ދޭން ފަށައި، ފަސިންޖަރުންނަށް ދޭ ހިދުމަތްތައް ރަނގަޅުކުރުމުގެ ގޮތުން، ޓާމިނަލަށް ބަދަލުތައް ގެންނަމުންދާ ކަމަށް އެ ކުންފުނިން ބުންޏެވެ.

ހަމަ އެއާއެކު، ސްޕެޝަލައިޒޭޝަން ޕްރޮގްރާމްތައް މެދުވެރިކޮށް މުވައްޒަފުން ހަރުދަނާކުރުމުގެ މަސައްކަތްތައް ކުރެވިފައިވާ ކަމަށާއި، މުވައްޒަފުން އުފެއްދުމަށް ވެސް މަސައްކަތްތައް ކުރެވިފައިވާ ކަމަށް ވެސް އެމްއޭސީއެލުން ބުންޏެވެ.

ރާއްޖޭގެ މައި އަދި އެންމެ ފުރަތަމަ ވައިގެ ބަނދަރު ކަމަށްވާ ވެލާނާ އިންޓަނޭޝަނަލް އެއާޕޯޓް އެންމެ ފުރަތަމަ ހުޅުވާފައި ވަނީ "ހުޅުލޭ އެއާޕޯޓު"ގެ ނަމުގައި 19 އޮކްޓޯބަރު 1960 ގައެވެ. ހުޅުލޭގައި އެންމެ ފުރަތަމަ ތަރައްގީކުރި އެއާޕޯޓުގައި ބޭނުންކުރީ ދަގަނޑު ޝީޓުތަކުން ހަދާފައިވާ ރަންވޭއެކެވެ. ނަމަވެސް އާ ރަންވޭ އެއް ތަރައްގީކޮށް މީގެ 57 އަހަރު ކުރިން އެއާޕޯޓުގެ ބޭނުންކުރަން ފެށީ ކުރީގެ ރައީސް އަލްމަރްހޫމް އިބްރާހީމް ނާސިރުގެ ވެރިކަމުގައެވެ.

ހުޅުލެ އެއާޕޯޓުގެ ގޮތުގައި ތަރައްގީކޮށް ހުޅުވި އެއާޕޯޓުގެ ނަން "މާލެ އިންޓަނޭޝަނަލް އެއާޕޯޓަ"ށް ބަދަލުކޮށްފައި ވަނީ 11 ނޮވެމްބަރު، 1981 ގައެވެ. އޭގެ ފަހުން ކުރީގެ ރައީސް މުހައްމަދު ނަޝީދުގެ ވެރިކަމުގައި އެއާޕޯޓުގެ ނަން ވަނީ 26 ޖުލައި 2011 ގައި "އިބްރާހީމް ނާސިރު އިންޓަނޭޝަނަލް އެއާޕޯޓަ"ށް ބަދަލުކޮށްފައެވެ. އަދި 2017 ގެ ފުރަތަމަ ދުވަހު، ކުރީގެ ރައީސް އަބްދުﷲ ޔާމީންގެ ވެރިކަމުގައި "ވެލާނާ އިންޓަނޭޝަނަލް އެއާޕޯޓަ"ށް ނަން ބަދަލުކޮށްފައި ވެއެވެ.

އެމްއޭސީއެލް ވެލާނާ އެއާޕޯޓް