ރަމަޟާން މަހުގެ ފުރަތަމަ ދުވަހަކީ ބުރާސްފަތި ދުވަސް ކަމަށް ސަރުކާރުން ކަނޑައަޅައިފިއެވެ.
ރާއްޖެއިން މިގޮތަށް ނިންމީ، މިއަހަރުގެ ރަމަޟާން މަހުގެ ހަނދު ސާބިތު ކުރުމަށް މިއަދު ސައުދީގައި ކުރިއަށް ގެންދިޔަ ހަރަކާތަށް ފަހު އެއްވެސް ފަރާތަކަށް ހަނދު ފެނިފައި ނުވާތީ މިއަހަރުގެ ރަމަޟާން މަހުގެ ފުރަތަމަ ދުވަހަކީ ބުރާސްފަތި ކަމަށް އެ ގައުމުގައި ކަނޑައަޅައިފާ ވަނިކޮށެވެ.
އިހުއްސުރެ ރާއްޖޭގައި ރޯދައަށް ހަނދު ބަލައެވެ. ހަނދު ބެލުމުގައި އާންމުކޮށް އަމަލު ކުރަމުން އައި ގޮތަކީ، ޝައުބާން މަހުގެ ފަހު ދުވަހު އިރުއޮއްސޭއިރު ހަނދު ފެންމަތީގައި ހުންނާނެކަމަށް ފަލަކީ ހިސާބުތަކުން ދައްކާ، ރާއްޖެއަށް ނުވަތަ އެހެން އިސްލާމީ ގައުމަކަށް ހަނދު ފެނިއްޖެނަމަ ރޯދަ ހިފަން ފަށާ ގޮތަށެވެ.
އަދި ހަނދު ސާބިތު ކުރުމާ ގުޅޭ ކަންކަން ބަލަހައްޓަމުން އައީ އިސްލާމިކް މިނިސްޓްރީންނެވެ.
އިރުއަރާ އޮއްސޭ ދަނޑިން، ދުނިޔޭގެ ގަޑިއަށް ބަލާ އިރު މިއަހަރު އެންމެ ގިނަ ވަގުތު ރޯދަ ހިފަން ޖެހޭ ބަޔަކީ، ގްރީންލޭންޑްގެ ނޫކް، އައިސްލޭންޑްގެ ރޭކްޖަވިކް، ފިންލޭންޑްގެ ހެލްސިންކީ، ސްވިޑަންގެ ސްޓޮކްހޯމް އަދި ސްކޮޓްލޭންޑްގެ ގްލާސްގޯ އެވެ. މި ސިޓީތަކުގައި މިއަހަރު އެވްރެޖް ގޮތެއްގައި 17 ގަޑި އިރު ރޯދަ އަށް ތިބެން ޖެހޭނެއެވެ.
