ރޭ އިދިކޮޅުން ކުރިއަށް ގެންދިޔަ މުޒާހަރާ ތެރެއިން ރައީސްގެ މޮޓޯކޭޑް އަށް ހުރަސްއެޅި މައްސަލާގައި ކޮމާންޑިން އޮފިސަރު ކާނަލް އަބްދުﷲ އިބްރާހިމް ސަސްޕެންޑްކޮށްފިއެވެ.
އަބްދުﷲ އިބްރާހިމް ސަސްޕެންޑްކޮށްފައިވަނީ އެ މައްސަލަ މަޖިލީހުގެ 241 ކޮމިޓީއިން ބަލަމުން ދަނިކޮށެވެ.
މައުލޫމާތު ލިބިފައިވާ ގޮތުގައި އަބްދުﷲ މުހައްމަދާއި އިތުރު ސިފައިންގެ ބަޔަކުވެސް ވަނީ ސަސްޕެންޑްކޮށްފައެވެ. އެހެންކަމުން ރައީސްގެ ސެކިއުރިޓީ ޔުނިޓާއި މިހާރު ހަވާލުވެ ހުންނެވީ ޑެޕިއުޓީ ކޮމާންޑަރު އަހުމަދު ހަލީމެވެ.
ރައީސްގެ މޮޓޯކޭޑް އަށް ހުރަސްއެޅި ކަމުގެ ތުހުމަތުގައި ތިން ފިރިހެނަކާއި އަންހެނަކު ރޭ ފުލުހުންގެ ބެލުމުގެ ދަށަށް ގެންގޮސްފައި ވާއިރު ފުލުހުން ބުނީ އޭގެ ތެރެއިން އަންހެނަކާއި ފިރިހެނެއްގެ ބަންދަށް 5 ދުވަހުގެ މުއްދަތެއް އަދި އިތުރު ދެ ފިރިހެނުންގެ ބަންދަށް 15 ދުވަހުގެ މުއްދަތެއް ޖަހާފައިވާ ކަމަށެވެ.
ރޭ އިދިކޮޅުން ޕީޕީއެމް އޮފީސް ދޮރުމަތީގައި މުޒާހަރާ ކުރިއަށް ގެންދަނިކޮށް ރައީސް އިބްރާހިމް މުހައްމަދު ސޯލިހްގެ މޮޓޯކޭޑް ވަނީ ބޮޑުތަކުރުފާނު މަގުން ޕީޕީއެމް އޮފީސް ދޮރުމަތިން ކުރިއަށް ދިއުމަށް މަސައްކަތް ކޮށްފައެވެ. އެހެންނަމަވެސް ކުރީގެ ރައީސް އަބްދުﷲ ޔާމީންގެ ގެކޮޅު ހިމެނޭ ސަރަހައްދުން މުޒާހަރާގެ ބައިވެރިން ވަނީ މޮޓޯކޭޑަށް ހުރަސް އަޅާފައެވެ.
މައުލޫމާތު ލިބުނު ގޮތުގައި މޮޓޯކޭޑު އެ ސަރަހައްދުގައި 15 ވަރަކަށް މިނެޓު ތާށިވިއިރު ކާރުކޮޅަށް ކުރިއަށް ދެވޭ ގޮތް ނުވުމުން އަނބުރާލެއްވުމަށް ފަހު ވަޑައިގަތީ ބޮޑުތަކުރުފާނުގެ މަގުގެ ދެކުނަށެވެ. މުޒާހަރާގެ ބައިވެރިން ވަނީ ރައީސް ސޯލިހް އިންނެވި ކާރުކޮޅު ކައިރިއަށް ގޮސް ޕީޕީއެމްގެ ދިދަ ވިހުރުވާ ހަދާފައިވެއެވެ. އަދި އެމީހުން ފަހަތައް ޖެއްސުމަށް ރައީސްގެ ސެކިއުރިޓީން ހަރަކާތްތެރިވެފައިވެއެވެ.
