އެމްޑީޕީ އުފެއްދި އެއްބާނީ، ރައީސް މުހައްމަދު ނަޝީދާ ނުލައި އެ ޕާޓީ ދެމި އޮންނާނެ ކަމަށް ގަބޫލު ނުކުރައްވާ ކަމަށް ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖޭޕީގެ 4 ވަނަ ކޮންފަރެސް ނިންމުމަށް ދަރުބާރުގޭގައި ރޭ ބޭއްވި ޖަލްސާގައި ރައީސް މުހައްމަދު ނަޝީދުވެސް ވަޑައިގެން އިންނެވުމާއެކު އެ ނުކުތާގައި ގާސިމް ވިދާޅުވީ، އެމްޑީޕީ އުފެއްދެމުގައި ގާސިމް ވެސް އުޅުއްވި ފަދައިން ރައީސް ނަޝީދު މުހިންމު ދައުރެއް އަދާކުރެއްވި ކަމަށެވެ. އަދި އެދުވަސްވަރު ކަންތައް ދިމާވި ގޮތުން ނަޝީދަށް ހުންނަވަން ޖެހިވަޑައިގަތީ ރާއްޖެއިން ބޭރުގައި ނަމަވެސް ނަޝީދަކީ އެމްޑީޕީގައި މުހިންމު ދައުރެއް އަދާކުރެއްވި ބޭފުޅެއް ކަމަށެވެ.
އަދި އޭރު އޮތް ރައީސް މައުމޫން އަބްދުލްގައްޔޫމްގެ ވެރިކަން ނިމުމަކަށް ގެނެސް ވެރިކަމަށް ވަޑައިގެންނެވި ނަޝީދަށް ވެރިކަން ގެއްލުނީ ދުނިޔޭގެ ކަންކަމުގައި ތަޖުރިބާ ހުންނަން ޖެހޭ ވަރަށް ލިބިވަޑައިގެންފައި ނެތުމުން ކަމަށާއި އޭގެ ސަބަބުން "ގޯހެއް" ހެއްދެވުނީ ކަމަށް ވެސް ގާސިމް ވިދާޅުވިއެވެ.
ނަމަވެސް މިހާރު އެކަން ރަނގަޅުވެފައި ހުންނާނެ ކަމަށް ގަބޫލުކުރައްވާ ކަމަށާއި ނަޝީދާ ނުލާ އެމްޑީޕީ އޮންނާނެ ކަމަށް ގަބޫލު ނުކުރައްވާ ކަމަށް ވެސް ގާސިމް ވިދާޅުވިއެވެ.
ގާސިމް އިތުރަށް ވިދާޅުވީ، އިންސާނުންނަށް ގޯސް ވެސް ހެދޭނެ ކަމަށާއި އަދި ކުށްވެސް ކުރެވޭނެ ކަމަށާއި ނަމަވެސް ތައުބާވުމަކީ އޮތް ކަމެއް ކަމަށެވެ. އަދި ގޯހެއް ހެދުމުން އެ ގޯސް ހެދުނު މީހާ ނޭދުނަސް އެކަމަށް މައާފު ކުރަން ޖެހޭނެ ކަމަށާއި އެހެން ނޫންނަމަ ދެން ރޯވާނީ ފިތުނަ އާއި ފަސާދައިގެ ހުޅުގަނޑު ކަމަށްވެސް ގާސިމް ވިދާޅުވިއެވެ.
ގާސިމް ވަނީ ނަޝީދުގެ ވެރިކަމުގައި ގާސިމަށް ފަހިވި ބައެއް ކަންތައްތަކުގެ މައްޗަށް އަލިއަޅުއްވާލައްވައި ނަޝީދަށް ތައުރީފު ވެސް ކުރައްވާފައެވެ. އޭގެ ތެރެއިން އެއް ކަމަކީ ނަޝީދުގެ ވެރިކަމުގައި ގާސިމްގެ ވިލާ ކޮލެޖަށް ޕްރައިވެޓް ޕާޓްނާޝިޕްގެ ދަށުން ދިން ހުއްދަ ކަމަށާއި އެ ކޮލެޖު އުފެދުމުގެ މެދުވެރިއަކަށް ވީ ނަޝީދު ކަމަށް ގާސިމް ވިދާޅުވިއެވެ. އަދި ތައުލީމާ ދާއިރާއަށް ހިދުމަތް ކުރުމަށް ލިބިވަޑައިގެންފައި ފުރުސަތާއި މިހާރުވެސް ކުރައްވާ މަސައްކަތަކީ، ގާސިމްގެ ލަޔާގަތާއި ގާބިލިއްޔަތު ތަންދިން އެންމެ މަތީ ދަރަޖައަކަށް ގައުމަށް ހިދުމަތް ކުރެއްވުން ކަމުގައި ވިދާޅުވިއެވެ.
ރޭގެ ޖަލްސާގައި މި މޭރުމުން ގާސިމް ވާހަކަ ދައްކަވާފައި ވާއިރު، ކޮންފަރެންސް ފެށުމަށް މިދިޔަ ހުކުރު ދުވަހު ބޭއްވި ޖަލްސާގައި ގާސިމް ވަނީ، ސިޔާސީ މައްސަލައެއްގެ ތަހުގީގަށް ކަމަށް ބުނެ ގާސިމަށް ވެސް ހުންނަވަން ޖެހިވަޑައިގަތީ އެތައް ފަހަރެއްގެ މަތިން ދޫނިދޫ ޖަލުގައި ކަމަށް ވިދާޅުވެ، ނަޝީދުގެ ފަހުން ވެރިކަމަށް ވަޑައިގެންނެވި ރައީސް އަބްދުﷲ ޔާމީނަށް ބަހުގެ ހަމަލާތައް ދެއްވާފައެވެ. އޭގެ ތެރެއިން ލިބުނު އަނިޔާއެއްގައި ފަރުވާ ދެނިކޮށް، އިއްވި "ޣައިރު ގާނޫނީ ހުކުމެއްގެ" ސަބަބުން ބޭސްފަރުވާއަށް ރާއްޖެއިން ބޭރަށް ފުރައިވަޑައިގެންނަވަން ޖެހިވަޑައިގެން ކަމަށް ގާސިމް ވިދާޅުވިއެވެ.
ހާއްސަ ހުއްދައެއްގެ ދަށުން ސިންގަޕޫރުގައި ތިން މަހެއްހާ ދުވަހަށް ހުންނެވުނީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އެހީތެރިކަމުގެ ސަބަބުން ކަމަށާއި އަދި ޖަރުމަނަށް ދަތުރުކުރެއްވުމުގައި ވެސް ނަޝީދުގެ އެހީތެރިކަން ލިބިވަޑައިގެންނެވި ކަމަށް ވިދާޅުވެ، އެ ޖަލްސާއަށް ވެސް ވަޑައިގެންނެވި ނަޝީދަށް ގާސިމް ވަނީ ތައުރީފް ބަސްތައް އޮއްސާލައްވާފައެވެ.
ގާސިމް ވިދާޅުވީ ރައީސް ނަޝީދާއި އެމަނިކުފާނަކީ ގައުމަށްޓަކައި ވަރަށް ގިނަ ބުރަމަސައްްކަތްތަކެއް ކުރެއްވި ދެބޭފުޅުން ކަމަށާއި، އެމަސައްކަތުގެ ތެރެއިން ލިބިވަޑައިގެންނެވި އަނިޔާ އާއި ވޭނުގެ ވާހަކަތަކަކީ ވަރަށް ފުން ޖަޒުބާތުތަކެއް ކަމަށެވެ.
ރޭގެ ޖަލްސާގައި ގާސިމް ވަނީ، ރައީސް އިބްރާހިމް މުހައްމަދު ސޯލިހު ނޫން އެހެން ހުރިހާ ވެރިން؛ ރައީސް ޔާމީނާއި، ރައީސް މުހައްމަދު ވަހީދު ހަސަން މަނިކާއި، ރައީސް ނަޝީދު ކުރައްވާފައި ހުރި ރަނގަޅުކަންކަމުގެ ވާހަކަ ކޮންފަރެންސް ހުޅުވުމުގައި ޖަލްސާގައި ދައްކަވާފައި ވުމުން އާންމުންގެ ފަރާތުން އަމާޒުވި ފާޑުކިޔުމަށް ރޭ ރައްދު ދެއްވާފައެވެ.
އެގޮތުން ގާސިމް ވިދާޅުވީ، އެހެން ހުރިހާ ވެރިން ކުރެއްވި ރަނގަޅު ކަންކަމުގެ ވާހަކަ ދެއްކެވި އިރު ރައީސް އިބްރާހިމް މުހައްމަދު ސޯލިހުގެ ވާހަކަ ވިދާޅުނުވެގެން މީހުން ކަންބޮޑުވަނީ، ރައީސް ސޯލިހަކީ ގޯސް ބޭފުޅެކޭ އޭނާ އަށް ވިދާޅުވެވިގެންތޯއެވެ.
ހިނގަމުން މިދާ ރައީސް ސޯލިހުގެ ސަރުކާރުގެ އެންމެ ބޮޑު ކޯލިޝަން ޕާޓުނަރު ޖޭޕީގެ ލީޑަރު ސޯލިހާ ބެހޭ ގޮތުން ތައުރީފުގެ އިތުރު ބަހެއް ވިދާޅެއް ނުވެއެވެ. ގާސިމްގެ އިތުރުން ޖޭޕީގެ ލިޑާޝިޕްގައި ތިއްބެވި ބޭފުޅުންވެސް ސޯލިހަށް ތައުރީފުގެ ބަހެއް ވިދާޅުވެފައެއް ނުވެއެވެ. ނަމަވެސް ޖޭޕީގެ ފަރާތުން އަންނަ ތިޔާސީ އިންތިހާބުގައި ވާދަ ކުރުމަށް ގޮތެއް ނިންމަން ކައުންސިލަށް ބާރު ދޭ ގަރާރަށް ބަހުސް ކުރި މަރުހަލާފައި ޖޭޕީގެ ސްލޮޓެއްގައި ރައީސް އޯފީހުގެ މިނިސްޓަރަކަށް ހުންނެވި އަހުމަދު ސަމީރު ސަރުކާރާއި ރައީސް ސޯލިހުގެ މަސައްކަތަކަށް ތައުރީފް ކުރެއްވިއެވެ.
ޖޭޕީގެ މުޅި ރޫހު ހުރިގޮތަށް ބަލާއިރު، ގިނަ މެންބަރުން ބުރަވަނީ، އަންނަ ރިޔާސީ އިންތިހާބުގައި ޖޭޕީ، ސަރުކާރު ކޯލިޝަނާ ވަކިން ނިކުތުމަށެވެ.
