ޖުމްހޫރީ ޕާޓީގެ އަސާސީ ގަވާއިދަށް ހުށަހެޅި ތިން އިސްލާހު ޕާޓީގެ ގައުމީ ކޮންފަރެންސްގައި ފާސްކޮށްފިއެވެ.
ޖޭޕީގެ ކޮންފަރެންސް އިން ފާސްވެފައިވާ އިސްލާހުތަކަކީ މެންބަރުންގެ ހައްގުތައް ވަގުތީ ގޮތުން ހިފެހެއްޓުމެވެ. މި އިސްލާހުގައި ވަނީ މެންބަރުގެ މެންބަރުކަމުގެ ހައްގެއް ނުވަތަ ހައްގުތައް ނުހިފަހައްޓާ ޕާޓީގެ މަގްސަދު ހާސިލު ކުރެވިދާނެތޯ ނުވަތަ ޕާޓީގެ މަސްލަހަތު ހިފެހެއްޓިދާނެތޯ ސުވާލު އުފެއްދުމެވެ.
ދެވަނަ އިސްލާހަކީ ޕާޓީގެ ލީޑަރުގެ ސްޕެޝަލް އެޑްވައިޒަނުންނާއި ލީޑަރުގެ އެޑްވައިޒަރުންނާއި ލީޑަރުގެ 5 އެޑްވައިޒަރުން ތިބެންވާނެ ކަމަށެވެ. އަދި ޕާޓީގެ އެޑްވައިޒަރުންގެ ތެރޭގައި ހިމެނެން ޖެހޭ މީހުންނާއި ޕާޓީ ހިންގުމުގައި އަދި ސިޔާސީ ކަންކަމުގައި ޕާޓީގެ ލީޑަރަށް އިރުޝާދާއި ލަފަޔާއި އެހީތެރިކަން ދޭންވާނެ ކަމަށް ވަނީ ބުނެފައެވެ.
ތިން ވަނަ އިސްލާހަކީ ޕާޓީގެ ކައުންސިލް އެކުލެވިގެންވާ ގޮތް ކަނޑައެޅުމަށް ހުށަހެޅި އިސްލާހެވެ.
ޖޭޕީގެ ހަތަރުވަނަ ގައުމީ ކޮންފަރެންސް މިއަދު ފަށާފައި ވާއިރު މި ކޮންފަރެންސްގައި އެޕާޓީގެ އެތެރޭގެ އިންތިހާބުތަކުގެ އިތުރުން، 2023 ވަނަ އަހަރުގެ ރިޔާސީ އިންތިހާބާ ގުޅޭ ނިމުންތައް ނިންމާނެއެވެ.
މިގޮތުން އެ ޕާޓީގެ ލީޑަރު، ޕާޓީގެ ޑެޕިއުޓީ ލީޑަރުން، ޒުވާނުންގެ ލީގުގެ ރައީސް، ޒުވާނުންގެ ލީގުގެ ނައިބު ރައީސް، ޒުވާނުންގެ ލީގުގެ ސެކްރެޓަރީ، ޒުވާނުންގެ ލީގުގެ މެންބަރުން، އަންހެނުންގެ ލީގުގެ ރައީސް، އަންހެނުންގެ ލީގުގެ ނައިބު ރައީސް، އަންހެނުންގެ ލީގުގެ ސެކްރެޓަރީގެ އިތުރުން އަންހެނުންގެ ލީގުގެ މެންބަރުން، އަދި ގައުމީ ކޮންފަރެންސްއިން އިންތިހާބުކުރާ 25 މެންބަރުން އިންތިހާބު ކުރުމަށް ވަނީ ހަމަޖެހިފައެވެ.
