ގްރެމީ އެވޯޑުގެ ތާރީހުގައި އެންމެ ގިނަ ގްރެމީ އެވޯޑްސް އުފުލާލި ފަންނާނަކަށް މަޝްހޫރު ލަވަކިޔުންތެރިޔާ ބިޔޯންސޭ ވެއްޖެއެވެ.
މިއުޒިކް އިންޑަސްޓްރީގެ އެންމެ ޝަރަފުވެރި އެވޯޑު ކަމަށްވާ "ގްރެމީ"ގެ ނޯމިނޭޝަން ލިސްޓުގެ އެންމެ ކުރީގައި ވެސް މިފަހަރު ހިމެނިފައިވަނީ ބިޔޯންސޭއެވެ. ނުވަ އެވޯޑުގެ ނޮމިނީޝަން އާއެކު ރޭޙުގެ އެންމެ ކުރީގައި ބިޔޯންސޭ ހިމެނުނު އިރު އޭނާ ވަނީ އޭނާގެ މިއުޒިކީ ކެރިއަރުގައި 32 ވަނަ ގްރެމީ އެވޯޑްސް އުފުލާލާފައެވެ. އެއީ އާދިއްތަ ދުވަހުގެ ރޭ ބޭއްވި 65 ވަނަ ގްރެމީ އެވޯޑްސްގައި ލިބުނު ހަތަރު އެވޯޑާއެކުގައެވެ.
ބިޔޯންސޭ ނޯމިނޭޓްވި ކެޓަގަރީގެ ތެރޭގައި އެންމެ ޝަރަފުވެރި އެވޯޑު "އަލްބަމް އޮފް ދަ އިޔާ" އިން އޭނާ އާއި އެންމެ ގާތުން ވާދަކުރާ ލަވަކިޔުންތެރިންނަކީ "ހެރީ ސްޓައިލްސް ގެ "ހެރީސް ހައުސް"ގެ އިތުރުން ލިޒޯގެ "ސްޕެޝަލް" އާއި އެބާގެ "ވޮޔޭޖް" އާއި ބޭޑް ބަނީގެ "އުން ވެރޯނީ ސިން ތީ" އަދި މެރީ ޖޭ ބްލައިޖްގެ "ގުޑްމޯނިން ގޯޖަސް" އެވެ. ބިޔޯންސޭގެ އަލްބަމަކީ ރިނޭސޯންސް" އެވެ. އެ އެވޯޑު ލިބުނީ ހެރީ ސްޓައިލްސް އަށެވެ.
ގްރެމީގެ 65 ވަނަ އެވޯޑު ޝޯ ބިޔޯންސޭ އެންމެންގެ ހިތް އަތުލި އިރު ވަން ޑިރެކްޝަނުން މިއުޒިކް އިންޑަސްޓްރީ އަށް ނުކުތް ލަވަކިޔުންތެރިޔާ ހެރީ ސްޓައިލްސް އަށް ވަނީ އެންމެ މޮޅު އަލްބަމްގެ ރެެކޯޑު ލިބިފައެވެ. މިއީ އޭނާގެ ތިން ވަނަ ގްރެމީއެވެ. މިފަހަރު އޭނާ އަށް ގްރެމީ އެވޯޑު ލިބުނީ "ހެރީސް ހައުސް" އަލްބަމް އަށެވެ. މިދިޔަ އަހަރު އޭނާ ނެރުނު އެ އަލްބަމުގައި 13 ލަވަ ހިމެނުނު އިރު އޭގެން އެންމެ މަޝްހޫރުވި ލަވައަކީ "އޭޒް އިޓް ވޯޒް" އެވެ.
