ޝޯ ގެ ސްޓާ ޑިލަން އޮބްރަޔަން ނެތުމުން "ޓީން ވުލްފް" ގެ ފިލްމު ރީތި ނޫންކަމަށް ބުނެފިއެވެ.
ކްރިޓީކުންގެ އިތުރުން ޝޯގެ ފޭނުން ވަނީ ފިލްމަށް ވަރަށް ބޮޑަށް ފާޑުކިޔާފައެވެ. 2021 ވަނަ އަހަރު "ޓީން ވުލްފް" ގެ ޓީމުން ވަނީ އެނބުރި "ޓީން ވުލްފް" އަންނާނެ ކަމަށް ބުނެފައެވެ. އޭގެ ދެ އަހަރުފަހުން ފިލްމެއްގެ ޒަރިއްޔާ އިން ޓީން ވުލްފް ގެނެސްދީފައިވަނީ ހަ ވަނަ ސީޒަން ނިންމާލި ތަނުން ފަށައިގެންނެވެ. ޓީން ވުލްފް ސީރީޒްގައި އުފައްދަމުން އައި ޕްލޮޓުތައް މިފަހަރުގެ ފިލްމުގައި ފެނިގެންނުދާކަމަށް ކްރިޓީކުން ވެސް ވަނީ އެއްބަސްވެފައެވެ. ސީރީޒް އާއި އަޅާބަލާއިރު ފިލްމު ރީތި ނޫންކަމަށާއި ފިލްމުގައި އޮށްޓަރެއް ނެތް ކަމަށް އެމީހުން ބުނެއެވެ. ރޮޓަން ޓޮމާޓޯސް އިން މި ފިލްމަށް ދިން ރޭޓިން އަކީ 100 އިން 40 އެވެ.
ޝޯ ގެ ފިލްމެއް އަންނާނެ ކަން އިއުލާންކުރުމާއެކު ފޭނުން ކެތްކުރަމުން އައީ ޝޯގެ މެއިން ދެތަރިން ކަމަށްވާ ޓެއިލާ ޕޮސީ (ސްކޮޓް) އަދި ޑިލަން އޮބްރިޔަން (ސްޓައިލްސް) ގެ ކެމިސްޓްރީ އަނެއްކާ ވެސް ބެލުމަށެވެ. ނަމަވެސް ސީރީޒްގެ ޓީމުން މިފަހަރުގެ ފިލްމުން ސްޓައިލްސް ކެރެކްޓާ ނުފެންނާނެ ކަން އިއުލާންކުރުމުން ފޭނުން މުޅިން މާޔޫސްވިއެވެ.
2011 ވަނަ އަހަރު ދައްކަން ފެށި މި ސީރީޒް ނިންމާލީ 2017 ވަނަ އަހަރުއެވެ. ޖުމްލަ ހަ ސީޒަން ގެނެސްދިން އިރު މި ސީރީޒް އަކީ ޒުވާނުންގެ މެދުގައި އޭރު އެންމެ މަގްބޫލު އެއް ސީރީޒްވެސްމެއެވެ. އިންސާނީ ވެއާ ވުލްފް ތަކެއް ފެނިގެންދާ "ޓީން ވުލްފް: ދަ މޫވީ" އިން ފެނިގެންދިޔަ މައިގަނޑު ތަރިންނަކީ ޓެއިލާ ޕޮސީ (ސްކޮޓް)، ކްރިސްޓަލް ރީޑް (އެލިސަން)، ޓެއިލާ ހޯކްލިން (ޑެރެކް)، ހޮލެންޑް ރޯޑެން (ލިޑިއާ)، ޝެލީ ހެނިން (މަލިއާ) އަދި ޑިލަން ސްޕްރޭޕެރޭ (ލިއަމް) އެވެ.
