ތިން އަހަރުގެ މެދުކެނޑުމަކަށް ފަހު ރާއްޖޭގައި ދިވެހި ފިލްމު ބެލުމަށް ހަދާފައި ހުންނަ ހަމައެކަނި ސިނަމާ އޮލިމްޕަސް ތިއޭޓަރު ހުޅުވާއިރު އެ ސިނަމާގައި އަޅުވާ ފުރަތަމަ ފިލްމަކީ ޑާކްރެއިން އެންޓަޓެއިންމަންޓް ގެ "ބީވީމާ" އެވެ.
އަންނަ މަހުގެ ހަ ވަނަ ދުވަހު "ބީވީމާ" ސްކްރީނަށް ގެންނަން ނިންމާފައި ވާއިރު ފެބްރުއަރީ 10 ވާ ހުކުރު ދުވަހު ވަނީ "ބީވީމާ"ގެ ދެ ޝޯ އެއް އޮލިމްޕަހުގައި އަޅުވަން ނިންމާފައެވެ. ޑާކްރެއިނުން ބުނީ އެ ދުވަހުގެ ހަވީރު 16:00 ގައި އެއް ޝޯ އަޅުވާނެ ކަމަށާއި ހަމަ އެރޭ 21:00 ފިލްމު އެޅުވުމަށް ހަމަޖެހިފައިވާ ކަމަށެވެ.
ފިލްމުގެ ޓިކެޓް މިހާރު އޮލިމްޕަހުން ވިއްކަން ފެށި އިރު ހެނދުނު 10 އިން ރޭގަނޑު 10:00 އަށް އޮލިމްޕަހުން ޓިކެޓް ގަންނަން ލިބޭނެއެވެ. ފިލްމުގެ ޓިކެޓަށް ބޮޑު ތަރުހީބެއް ލިބެމުންދާއިރު މި ފިލްމަކީ ލަވަކިޔުންތެރިޔާ މަރިޔަމް އަޝްފާ ދިވެހި ފިލްމު އިންޑަސްޓްރީ އަށް ތައާރަފްވާ ފިލްމުވެސް މެއެވެ. ޑާކްރެއިން އެންޓަޓެއިންމަންޓުގެ ދަށުން ގެނެސްދޭ މި ފިލްމުގެ ޕްރޮޑިއުސަރަކީ މުހައްމަދު އަލީ (މޮގާ) އާއި އޭނާގެ އަންހެނުން އައިޝަތު ފުއާދު ތައުފީގެވެ. މުހައްމަދު ވިޝާން (ކަނޑި) ކެމެރާ ކުރާ މި ފިލްމުގެ ތަރިންނަކީ ލަވަކިޔުންތެރިޔާ އަޝްފާ، ކޮޕީ އިއްސެ، އައިޝަތު ޔާދާ، ސިލްނާ، އާޝާ، އައިޝަތު އަލީގެ އިތުރުން ހުނޭޝާ އާދަމް ނަސީރު އެވެ. އޭގެ އިތުރުން އަލީ ޝަޒްލީމް އާއި ޑާކްރެއިންގެ "މިއީ ލޯތްބަކީ" އިން ފެނިގެންދިޔަ ލަވަކިޔުންތެރިޔާ އަމަންގެ ކޮއްކޮ އާދަމް ޒިދާން (ނާނަ) ވެސް މި ފިލްމުން ފެނިގެންދާނެއެވެ.
ޑާކްރެއިނުން މިހާރުވެސް ސިނަމާތަކަށް ގެންނަން ނިންމާފައިވާ ތިން ފިލްމެއް އެބައޮތެވެ. އެއީ "ބަޅިނދު"، "ނޮވެމްބަރު" އަދި "ހިނދުކޮޅެއް" މި ތިން ފިލްމެވެ.
