ރާއްޖޭގެ އެކި ސަރަހައްދުތަކުގައި ޖޫނިއާ ކޮލެޖު އިމާރާތްތައް ގާއިމް ކުރެވިގެން ދިއުމަކީ މަތީ ތައުލީމް ކުރިއެރުވުމަށް ކުރެވޭ ފައިދާ ހުރި މަސައްކަތެއް ކަމަށް، ހަޔާ އެޑިއުކޭޝަން މިނިސްޓަރު ޑރ. އިބްރާހީމް ހަސަން ވިދާޅުވެއްޖެއެވެ.
ނ. ވެލިދޫގައި ޖޫނިއާ ކޮލެޖުގެ އިމާރާތެއް ގާއިމްކުރުމާ ގުޅޭ ގޮތުން އެ ރަށުގެ ކައުންސިލާއި ހަޔާ އެޑިއުކޭޝަން މިނިސްޓްރީ އާ ދެމެދު މިއަދު ވަނީ މަޝްވަރާ ކުރެވިފައެވެ. ހަޔާ އެޑިއުކޭޝަން މިނިސްޓްރީން ބުނީ، އެކި ރަށްރަށުގައި ޖޫނިއާ ކޮލެޖުގެ އިމާރާތްތައް ގާއިމްކުރުމުގެ މަޝްރޫއު ހިންގަނީ އެ މިނިސްޓްރީން އިސްނަގައިގެން، ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތިން ކަމަށެވެ.
ވެލިދޫގެ ކައުންސިލާ އެކު ކުރެއްވި މަޝްވަރާގައި މިނިސްޓަރު ވިދާޅުވީ، ޖޫނިއާ ކޮލެޖުގެ އިމާރާތްތައް ގާއިމްކުރުމުގެ މަޝްރޫއު ނިމޭއިރު ޖޫނިއާ ކޮލެޖުގައި ކިޔަވައިދިނުމަށް ބޭނުންކުރާނެ ބްލޮކެއްގެ އިތުރުން ދަރިވަރުންނަށް ހާއްސަ ދަނާލެއް ހުންނާނެ ކަމަށާއި، ދަނާލާ އެކު ކޮލެޖު ތަރައްގީ ކުރެވިއްޖެ ނަމަ ދެމެހެއްޓެނިވި ގޮތެއްގައި އެތަން ހިންގުމަށް މަގުފަހިވެގެން ދާނެ ކަމަށެވެ.
މިނިސްޓަރު ވިދާޅުވި ގޮތުގައި މި މަޝްރޫއަކީ ހުރިހާ ގޮތަކުން ވެސް ދިވެހި މުޖުތަމައަށް ފައިދާ ހުރި މަޝްރޫއެކެވެ. އަދި އެ މަޝްރޫއަކީ މަތީ ތައުލީމްގެ ފުރުސަތުތައް ފަހިކޮށް ކުރިއެރުވުމަށް ކުރެވޭ ބޭނުންތެރި މަސައްކަތެއް ކަމަށް ވެސް ވިދާޅުވިއެވެ.
ޖޫނިއާ ކޮލެޖުގެ އިމާރާތްތަކުގައި ހިމެނޭ ބައެއް ތަންތަން:
- ވޯކްޝޮޕްތަކާއި ކްލާސްރޫމްތަކާއި ސްޓަޑީ ރޫމްތައް
- އައިސީޓީ ލެބޯރެޓަރީ އެއް
- އިދާރީ ހިދުމަތްތަކަށާއި ދަރިވަރުންގެ ހިދުމަތްތަކަށް ހާއްސަ އޭރިއާ އެއް
- ސްޓާފް ރޫމެއް
- ލައިބްރަރީ އަކާއި އޮޑިޓޯރިއަމަކާއި މީޓިން ރޫމްތައް
- ކުޅިވަރު ކުޅެވޭނެ އިންތިޒާމްތައް
ހަޔާ އެޑިއުކޭޝަން މިނިސްޓްރީން ބުނި ގޮތުގައި މި މަޝްރޫއުގެ ދަށުން ވެލިދޫގައި ގާއިމްކުރާ އިމާރާތުގައި ތަފާތު ދާއިރާތަކުން ވޮކޭޝަނަލް ކޯސްތައް ހިންގުމަށް މަގުފަހިވާނެއެވެ.
އެމްޑީޕީގެ ޕްރައިމަރީ އާ ދިމާކޮށް ވެލިދޫ ހިމެނޭހެން ނ. އަތޮޅުގެ ބައެއް ރަށްރަށަށް ކުރެއްވި ކެމްޕެއިން ދަތުރުފުޅުގައި ރައީސް އިބްރާހީމް މުހައްމަދު ސޯލިހު ވަނީ އޭގެ ތެރެއިން ބައެއް ރަށްރަށުގައި ޖޫނިއާ ކޮލެޖް ގާއިމްކުރައްވާނެ ކަމަށް ވައުދުވެ ވަޑައިގެންފައެވެ.
މި އަހަރަށް ލަފާކޮށް ފާސްކުރި ދައުލަތުގެ ބަޖެޓުގައިވާ ގޮތުން ވެލިދޫގައި ގާއިމްކުރާ ޖޫނިއާ ކޮލެޖަށް 3.8 މިލިއަން ރުފިޔާ ހަރަދުވާނެއެވެ. ކައުންސިލްގެ ރައީސް އާތިފް ހުސައިން ވިދާޅުވީ، މިހާރު ކުރިއަށް ދަނީ އެތަނުގެ ސްޓްރަކްޗާ އާއި އިމާރާތްކުރާނެ ތަން ފައިނަލްކުރުމުގެ މަސައްކަތް ކަމަށާއި، އެ މަސައްކަތް ނިމުމުން ޖޫނިއާ ކޮލެޖް އިމާރާތުގެ އަމަލީ މަސައްކަތް ފެށޭނެ ތާރީހެއް ހަމަޖެހިގެން ދާނެ ކަމަށެވެ.
