އެމްޑީޕީގެ ރައީސް މުހައްމަދު ނަޝީދު އެދިވަޑައިގެންފައިވާ ގޮތަށް 459 މީހުންގެ ނަން އުނިކޮށް، ޕްރައިމަރީގައި ވޯޓު ލެވޭ މެންބަރުންގެ ދާއިމީ ލިސްޓު މިއަދު އާންމުކޮށްފިއެވެ.

މި މަހުގެ 28 ގައި ބާއްވާ ޕްރައިމަރީގައި ވޯޓު ދިނުމުގެ ހައްގު ލިބިގެންވާ މެންބަރުންގެ ވަގުތީ ލިސްޓު މިދިޔަ ބުރާސްފަތި ދުވަހު އާންމުކޮށް، ޝަކުވާ ހުށަހަޅަން ހުޅުވާލި މުއްދަތު އާދީއްތަ ދުވަހު ހަވީރު 4 އަށް ވަނީ ހަމަވެފައެވެ. އެމްޑީޕީން އާންމުކުރި ޓައިމްލައިންގައިވާ ގޮތުން މިއަދު ލިސްޓު އާންމުކުރަން ޖެހޭނެއެވެ.

މިއަދު އާންމުކުރި ލިސްޓުގައިވާ ގޮތުން އެމްޑީޕީގެ އެތެރޭގެ ޕްރައިމަރީގައި 57،255 މެންބަރުންނަށް ވޯޓު ލުމުގެ ހައްގު ލިބިގެންވެއެވެ. ބުރާސްފަތި ދުވަހު އާންމުކުރި ލިސްޓުގައި ތިބީ 57،714 މެންބަރުންނެވެ.

އިއްޔެ ބޭއްވި ޕްރެސް ކޮންފަރެންސެއްގައި އެމްޑީޕީގެ އިންތިހާބުތަކާ ބެހޭ ކޮމިޓީގެ ފަރާތުން ވާހަކަ ދައްކަވަމުން އެ ކޮމިޓީގެ މުގައްރިރު އަދި އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވީ، ޕްރައިމަރީގައި ވޯޓު ލުމުގެ ހައްގު ލިބިގެންވާ މީހުންގެ ލިސްޓުގައި ނަން ނެތިގެން 900 އެއްހާ މީހެއްގެ ޝަކުވާ ކޮމިޓީ އަށް ލިބިފައިވާ ކަމަށެވެ. އޭގެ ތެރޭގައި ހިމެނެނީ އެހެން ޕާޓީތަކުގައި ތިބި 212 މީހުންނާއި، ނަން ނެތް 683 މީހުންނެވެ.

އެއާއެކު، ނަޝީދު ފޮނުއްވި ބައެއް ސިޓީތަކުގެ ތެރެއިން ސިޓީއަކަށް އަލިއަޅުވާލައްވައި އިބްރާހީމް ވަހީދު ވިދާޅުވީ، އެމްޑީޕީގެ ޕްރައިމަރީގައި ވޯޓުލުމުގެ ހައްގު ލިބިގެންވާ މީހުންގެ ލިސްޓަށް ޕާޓީ އާ ފަހުން ގުޅުނު 459 މެންބަރެއްގެ ނަން އިތުރުކޮށްފައިވާ ކަމަށް ނަޝީދު ފޮނުއްވި ސިޓީއެއްގައި ވިދާޅުވި ކަމަށެވެ. އިބްރާހީމް ވަހީދު އިއްޔެ ވިދާޅުވި ގޮތުގައި އެ ޝަކުވާ ބަލައިގަނެ، 459 މެންބަރުންގެ ނަންތައް އުނިކުރަން ވަނީ ނިންމާފައެވެ.

ނަޝީދުގެ ކެމްޕެއިން ޓީމުން ތުހުމަތުކުރާ ގޮތުގައި، އެމްޑީޕީގެ ޕްރައިމަރީގައި ވޯޓުލެވޭ މީހުންގެ ދަފްތަރު އޮތީ ގަޑުބަޑުކޮށްފައެެވެ. އެހެންވެ ދަފްތަރުގެ މައްސަލަ ހައްލުވަންދެން ޕްރައިމަރީ ފަސްކޮށްދިނުމަށް ނަޝީދުގެ ޓީމުން އެދިފައިވެއެވެ. ނަމަވެސް ވޯޓުލެވޭ މީހުންގެ ދަފްތަރު ސައްހަ ކަމަށް ވިދާޅުވެ، ޕްރައިމަރީ ފަސްކުރަން ޖެހޭ އެއްވެސް ސަބަބެއް ނެތް ކަމަށް އިބްރާހީމް ވަހީދު ވިދާޅުވިއެވެ.

ހަބަރު އެމްޑީޕީ