ވ. އަތޮޅު ވެމްޕަރުފަޅު ހުޅަނގު އުތުރު ކަނޑުން އިންސާނެއްގެ ހަށިގަނޑު ފެނިއްޖެ ކަމަށް ފުލުހުން ބުނެފިއެވެ.
އެ ސަރަހއްދުން އިންސާނެއްގެ ހަށިގަނޑު ފެނިގެން ރިޕޯޓް ކޮށްފައި ވަނީ ހެންދުނު 9:03 ހާއިރު ކަމަށާއި އެ ހަށިގަނޑު މިހާރު ވަނީ ފުލުހުންގެ ލޯންޗަށް ނަގާފައި ކަމަށް ވެސް ބުނެއެވެ.
މިކަމާ ގުޅިގެން އިތުރަށް ބަލަންޖެހޭ ކަންކަން ދަނީ ބަލަމުން ކަމަށް ބުނި ނަމަވެސް އެ ހަށިގަނޑާ ގުޅޭ އިތުރު ތަފްސީލެއް އަދި ފުލުހުން ހާމައެއް ނުކުރެއެވެ.
އިންސާނެއްގެ ހަށިގަނޑު ވ. އަތޮޅު ކަނޑުން ފެނިފައިވާ އިރު، މިދިޔަ މަހު ގުޅީފަޅުގައި ހިނގި އަލިފާނުގެ ހާދިސާއަށް ފަހު އެ ތަނުން ވެސް ވަނީ އިންސާނެއްގެ ހަށިގަނޑުގެ ބައިތަކެއް ފެނިފައެވެ. އަދި އެ ބައިތައް ފެނުނު އިރު ގުޅީފަޅު އަލިފާނުގެ ހާދިސާއަށް ފަހު އެތަނުގައި ތިބި ބިދޭސީ މަސައްކަތްތެރިންގެ ތެރެއިން އެކަކު ވަނީ ގެއްލިފައެވެ. ނަމަވެސް އަދި މިހާތަނަށް އައި އިރު ވެސް އެ ހަށިގަނޑަކީ ގެއްލުނު މީހާގެ ހަށިގަނޑުގެ ބައެއް ކަން ކަށަވަރު ވެފައެއް ނުވެއެވެ.
