ރާއްޖޭގައި މަރުވާ މީހުންނާއި އެ މީހުންގެ މައްޗަށް ކުރެވޭ ކަށުނަމާދުގެ ގަޑިތައް އަންގައިދޭ "ކަށުނަމާދު" ފޭސްބުކް ޕޭޖާއި ވައިބާ ގްރޫޕް ހުއްޓާލުމަށް މާލެ ސިޓީ ކައުންސިލުން އަންގާފައިވާ ކަމަށް، އެ ޕޭޖުގެ ވެރިފަރާތުން ބުނެފިއެވެ.
މިއަދު ކުރި ޕޯސްޓެއްގައި އެ ޕޭޖުގެ ވެރިފަރާތް އަހްމަދު މުނައްވަރު ބުނީ، މަރުވާ މީހުންނާއި އެ މީހުންގެ މައްޗަށް ކަށުނަމާދު ކުރެވޭ ގަޑިތައް އިއުލާނުކުރުމަކީ ކައުންސިލުން ކުރަން ޖެހޭ ކަމެއް ކަމަށް، އަދި އަމިއްލަ ފަރުދެއްގެ ހައިސިއްޔަތުން އެ މަސައްކަތް ނުކުރެވޭނެ ކަމަށް ބުނެ، އެ މަސައްކަތް ހުއްޓާލަން ކައުންސިލުން އަންގާފައިވާ ކަމަށެވެ.
ނަމަވެސް ސިޓީ ކައުންސިލުން އެ ވާހަކަތައް ދޮގުކޮށް ކުރި ޓްވީޓެއްގައި ބުނީ، އެކަން ހުއްޓާލުމަށް މުނައްވަރަށް ކައުންސިލުން އެފަދަ އެންގުމެއް އަންގާފައި ނުވާނެ ކަމަށެވެ.
މުނައްވަރު ފަހުން ކުރި ފޭސްބުކް ޕޯސްޓެއްގައި ބުނި ގޮތުގައި، ކަށުނަމާދު އިއުލާނުކުރާ ޕޭޖު ނުހިންގޭނެ ކަމަށް ކައުންސިލުން އަންގާފައި ވަނީ ފަރުދީ ގޮތުންނެވެ. މުނައްވަރުގެ ޕޯސްޓަށް ބައެއް މީހުން ކުރި ކޮމެންޓުތަކަށް ޖަވާބު ދެމުން އޭނާ ބުނި ގޮތުގައި، އެކަން ނުކުރެވޭނެ ކަމަށް އަންގަވާފައި ވަނީ ކައުންސިލްގެ ސެކްރެޓަރީ ޖެނެރަލް މުޖުތަބާ ޖަލީލެވެ.
މީހަކު ކުރި ކޮމެންޓަކަށް ދިން ޖަވާބުގައި މުނައްވަރު ބުނީ، ކައުންސިލުން މިއަދު ބޭއްވި މީޓިންގައި އެސްޖީ އޭނާ އަށް އަންގަވާފައި ވަނީ ކައުންސިލްގެ މުވައްޒަފެއްގެ ގޮތުގައި ހުރެ، ކައުންސިލުން ރަސްމީ ހައިސިއްޔަތުން ކުރަން ޖެހޭ ކަންކަން ނުކުރެވޭނެ ކަމަށެވެ. ނަމަވެސް އޭނާ އެ މަސައްކަތް ކުރަނީ މައްޔިތާގެ އާއިލާ އިން އެދިގެން ކަމަށް އެސްޖީ އަރިހުގައި ދެންނެވި ކަމަށް މުނައްވަރު ބުންޏެވެ.
އޭނާ ބުނީ، މައްޔިތާގެ އާއިލާއިން ގުޅަނީ މުނައްވަރަކީ ސިޓީ ކައުންސިލްގެ މުވައްޒަފަކަށް ވުމުން ކަމަށް އެސްޖީ ވިދާޅުވެފައިވާ ކަމަށެވެ. އެހެންކަމުން ޕޭޖުގެ މަސައްކަތް ހުއްޓާލަން ރަސްމީ ލިޔުމަކުން އެކަން އަންގަން އެސްޖީގެ އަރިހުގައި ދެންނެވުމުން، "ރަނގަޅު ލިޔުމެއް" ދެއްވާނެ ކަމަށް އެސްޖީ ވިދާޅުވި ކަމަށް މުނައްވަރު ބުންޏެވެ.
ކަށުނަމާދު ޕޭޖު މެދުވެރިކޮށް މުނައްވަރު ކަށުނަމާދުގެ މައުލޫމާތު ފޯރުކޮށްދޭތާ ހަ އަހަރަށް ވުރެ ގިނަ ދުވަސް ވަނީ ވެފައެވެ. އެ ޕޭޖަކީ 70 ހާހަށް ވުރެ ގިނަ މީހުންގެ ލައިކްތައް ލިބިފައިވާ ޕޭޖެކެވެ.
