ކުރީގެ ރައީސް މުހައްމަދު ނަޝީދުގެ ވެރިކަމުގައި އެމަނިކުފާނުގެ ސްޕެޝަލް އެންވޯއީ އަކަށް ހުންނެވި އިބްރާހީމް ހުސައިން ޒަކީގެ ޕާސްޕޯޓު ކެންސަލްކުރުމަށް ސިވިލް ކޯޓުން ނެރުނު އަމުރުގެ މައްސަލަ ދައުލަތުން ސުޕްރީމް ކޯޓަށް ހުށަހަޅައިފިއެވެ.
ހުކުމް ތަންފީޒު މައްސަލައެއްގައި ޒަކީގެ ޕާސްޕޯޓު ކެންސަލް ކުރަން ސިވިލް ކޯޓުން އަމުރެއް ނެރުނީ 2020 ގައެވެ.
ދައުލަތުން ހައިކޯޓުގައި އެ މައްސަލަ އިސްތިއުނާފު ކުރުމުން އެ މައްސަލަ ހައިކޯޓުން މިދިޔަ ސެޕްޓެމްބަރު މަހު ބޭރުކޮށްލީ އެ މައްސަލަ އިސްތިއުނާފް ކުރުމުގެ ހައިސިއްޔަތެއް ދައުލަތަށް ލިބިގެން ނުވާ ކަމަށް ނިންމުމަށްފަހުގައެވެ.
ހައިކޯޓުގެ ނިންމުން އިސްތިއުނާފު ކުރަން ސުޕްރީމް ކޯޓަށް މައްސަލަ ހުށަހެޅީ މިދިޔަ ހަފުތާގައެވެ. އެ މައްސަލަ ބަލައިގަތުމާ މެދު ސުޕްރީމް ކޯޓުން އަދި ވަކި ގޮތެއް ނުނިންމައެވެ.
