ރިޔާސީ ވައުދުގެ ގޮތުގައި ވ. އަތޮޅު ރައްޔިތުންން ޕިކްނިކް ދިއުމަށް ދޭން ބުނި ރަށުގެ ގޮތުގައި ވ. ހުޅިދޫ ހަމަޖައްސަން ގޮވާލައި އެ ރަށަށް ވ. އަތޮޅުގެ ކައުންސިލާއެކު ބައެއް މީހުން އަރައި އިހުތިޖާޖު ކުރަން ފަށައިފިއެވެ.
މި އިހްތިޖާޖުގައި ވ. އަތޮޅުގެ އަތޮޅު ކައުންސިލްގެ ރައީސް ޝުޖާއު އަލީވެސް ބައިވެރިވެ ވަޑައިގަންނަވައެވެ. މި އިހްތިޖާޖަކީ އިއްޔެ ހެނދުނުން ފެށިގެން ކުރިއަށް ގެންދާ އިހުތިޖާޖެކެވެ. އިއްޔެ ފެށި އިހުތިޖާޖުގެ ބައިވެރިން ރޭ ވީ އިރު ވެސް ހުޅިދޫން ނުފައިބާ ތިބެ އެ ރަށުގައި ވަނީ ނިދާފައެވެ. އަދި މިއަދު ހެނދުނުން ފެށިގެން ވެސް އެ ރަށުގައި އަންނަނީ އިހުތިޖާޖު ކުރަމުންނެވެ.
އިހުތިޖާޖުގެ ބައިވެރިން ގޮވަމުން ދަނީ، އެރަށުގައި ހިންގާފައި ހުރީ ޖަރީމާ ކަމަށާއި އެގްރިމަންޓާ ހިލާފަށް ކަންކޮށްފައިވާ ބަޔަކާ އެކު ހަދާފައިވާ އެގްރީމަންޓް ބާތިލްކޮށް އެރަށް ވ. އަތޮލޫގެ ރައްޔިތުންނަށް ހަވާލުކޮށް ދިނުމަށެވެ.
ވ. ހުޅިދޫ ކުއްޔަށް ދޫކޮށްފައި ވަނީ ދަނޑުވެރިކަން ތަރައްގީ ކުރުމަށް 2017 ވަނަ އަހަރުގެ ތެރޭގައި އާރަށް އިންވެސްތްމަންޓް ޕްރައިވެޓް ލިމިޓެޑަށެވެ. 20 އަހަރަށް ދީފައިވާ އެ ރަށުގައި ދަނޑުވެރިކަން ކުރުމަށް ތައްޔާރުވަމުން އަންނަ ކަމަށް އާރަށް އިންވެސްޓްމަންޓް އިން ވަނީ ބުނެފައެވެ. އަދި އެކަމަށް ތައްޔާރުވުމަށް ރަށުގައި ބައެއް އިމާރާތް ހަދާފައިވާ ކަމަށްވެސް ބުނެއެވެ.
ވ. އަތޮޅު ކައުންސިލުން ބުނަނީ އެ ރަށުގެ ގޮނޑުދޮށަށް ވެސް ބޮޑެތި ގެއްލުންތަކެއް ލިބެމުން ދާ ކަމަށާއި ގޮނޑުދޮށަށް ބީއްސާލާފައި އޮންނަ ބާޖެއް ވެސް އެތާ އޮންނަތާ ދުވަސްތަކެއް ވެފައިވާ ކަމަށެވެ.
ވ. އަތޮޅު ކައުންސިލުން އިސްވެ އޮވެ އިއްޔެ އާއި މިއަދު ހުޅިދޫއަށް އަރައި އިހްތިޖާޖު ކުރަމުން އަންނަ އިރު، މި މަހުގެ 8 ވަނަ ދުވަހު ވަނީ ހުޅިދޫ ވަށައިގެން ކަނޑު އުޅަނދުތަކުގައި ވ. އަތޮޅުގެ ގެސްތްހައުސްތައް ހިންގާ ބައެއް ފަރާތްތައް ނިކުމެ ކަނޑުމަތީގައިވެސް އިހުތިޖާޖު ކޮށްފައެވެ. އެ އިހްތިޖާޖުގައި 10 އުޅަނދެއްގައި 50 އަށް ވުރެ ގިނަ މީހުން ބައިވެރިވެފައި ވެއެވެ.
