މަސްވެރިންގެ ހައްގުގައި "ލޭނާރު" ގެ ނަމުގައި އިއްޔެ ހަވީރު އިދިކޮޅުން ކުރި އިހްތިޖާޖުގެ ތެރެއިން ހައްޔަރުކުރި 10 މީހުންގެ 9 މީހަކު ދޫކޮށްލައިފިއެވެ.
މާލޭ މަސްމާރުކޭޓް ސަރަހައްދުގައި އިއްޔެ ކުރިއަށް ގެންދިޔަ މި އިހުތިޖާޖުގައި ހައްޔަރުކޮށްފައިވަނީ 7 އަންހެނުންނާއި 3 ފިރިހެނުންނެވެ. އޭގެ ތެރެއިން މިއަދު 9 މީހުން ދޫކޮށްލާފައިވާ ކަމަށް ޕީޕީއެމް އިން ބުނެއެވެ.
ޕީޕީއެމް އިން ބުނީ އަދިވެސް ބަންދުގައި ހުރީ ޕީޕީއެމްގެ ޔޫތު މެންބަރު އަލީ އިޒްހާން ކަމަށެވެ. އަދި އޭނާގެ ބަންދަށް 3 ދުވަސް ޖަހާފައިވާ ކަމަށް ޕީޕީއެމް އިން ބުނެއެވެ.
އިއްޔެގެ އިހުތިޖާޖުގައި ގިނަ ބަޔަކު ބައިވެރިވެފައިވާއިރު މި އިހްތިޖާޖްގެ ބައިވެރިން ވަނީ ރައީސް އިބްރާހިމް މުހައްމަދު ސޯލިހްގެ އިސްތިއުފާއަށް ވެސް ގޮވާފައެވެ. އަދި މި ސަރުކާރުން ނޫ އިގްތިސޯދު މަސްވެރިން ވެފައިވާ ވައުދުތައް ފުއްދުމަށް ވެސް ވަނީ ގޮވާލާފައެވެ.
މީގެ އިތުރުން މަސްވެރިން ބާނާ މަހަށް ހަމަ އަގު ދިނުމަށް ވެސް ބައިވެރިން ވަނީ ގޮވާލަމުންނެވެ.
މި އިހްތިޖާޖްގައި ޕީޕީއެމް / ޕީއެންސީގެ އިސް ލީޑަރުންވެސް ވަނީ ބައިވެރިވެ ވަޑައިގެންފައެވެ.
ބާނާ މަހަށް ހަމަ އަގު ހޯދާ ދިނުމާއި މަސްވެރީންނަށް ހާއްސަ ޕްލެޓްފޯމްތަކެއް ގާއިމު ކުރުމާއި ތެލުގެ އަގު ހެޔޮ ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ.
ނަމަވެސް މި ވެރިކަމަށް ހަތަރު އަހަރު ފުރެން ދާއިރު މަސްވެރި އާއިލާތައް ނިކަމެތިވަމުންދާ ކަމަށް މަސްވެރިންނާއި އިދިކޮޅުން ދަނީ ބުނަމުންނެވެ.
ބޮޑު ކަންނެލީގެ މަސްވެރިން މިހާތަނަށް ޝަކުވާ އުފުލާފައިވާ ކަންކަމަށް އެދެވޭ ހައްލެއް ނުލިބޭ ކަމަށާއި އެކަންކަމަށް އެދެވޭ ހައްލެއް ހޯދައި ދިނުމަށް ބޮޑު ކަންނެލީގެ މަސްވެރިންގެ ޔޫނިއަން އިން ވެސް ދާދި ފަހުން ވަނީ ގޮވާލައިފައެވެ.
