ކޮލެޖުތަކަށް ޔުނިވާސިޓީއެއްގެ ދަރަޖަ ދޭ އިސްލާހު، ކޮމިޓީ އަށް ދިރާސާކުރަން ފޮނުވާލައިފިއެވެ.
ތުލުސްދޫ ދާއިރާގެ މެންބަރު އިބްރާހީމް ނަސީމް ހުށަހެޅުއްވި އެ އިސްލާހު މަޖިލިހަށް ބަލައިގަތުމަށް ފާސްވީ ވޯޓުގައި ބައިވެރިވެ ވަޑައިގަތް 39 މެންބަރުންގެ އިއްތިފާގުންނެވެ.
އެ އިސްލާހު ބަލައިގަނެ، މިއަދު ވަނީ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީ އަށް ފޮނުވާލައިފައެވެ.
ނަސީމް އިސްލާހު ހުށަހަޅުއްވާފައި ވަނީ، ކޮލެޖަކަށް ޔުނިވާސިޓީއެއްގެ ދަރަޖަ ދެވޭނީ އެ ތަނެއް މެދުނުކެނޑި ހިންގާތާ 20 އަހަރު ވުމުން ކަމަށް އޮންނަ އޮތުން 15 އަހަރަށް ނުވަތަ 10 އަހަރަށް ދަށްކުރުމަށެވެ. ގާނޫނުގައި މިހާރު އޮތް ގޮތުން ކޮލެޖަކަށް ޔުނިވާސިޓީއެއްގެ ދަރަޖަ ދެވޭނީ އެ ތަނެއް ހިންގާތާ 20 އަހަރު ވުމުންނެވެ. ރާއްޖޭން ބޭރުގައި ނަމަ 10 އަހަރު ވުމުންނެވެ.
އޭގެ އިތުރުން އެ އިސްލާހުގައި ފަސް ދާއިރާ އެއް ހިމަނައި، މަދުވެގެން ތިން ދާއިރާއަކުން ލެވަލް ހަތަކާއި ނުވައެއްގެ ޕްރޮގްރާމްތައް އެ ކޮލެޖަކުން ނުވަތަ ބޭރުގެ ޔުނިވާސިޓީއަކުން ހިންގަން ޖެހޭނެ ކަމަށް ވެސް ހިމަނާފައިވެއެވެ. އެ ދާއިރާތަކަކީ:
- ސޯޝަލް ސައިންސް
- ލައިފް ސައިންސް އެންޑް މެޑިސިން
- ނެޗަރަލް ސައިންސް
- އާޓްސް އެންޑް ހިއުމަނިޓީ
- އިންޖިނިއަރިން އެންޑް ޓެކްނޮލޮޖީ
އަދި 500 ކުދިން ކޮލެޖެއްގައި ތިބެން ޖެހޭނެ ކަމަށާއި، އެކަޑެމިކް ޕްރޮގްރާމްތަކުގައި ކިޔަވައިދޭ ލެކްޗަރާއިންގެ ތެރެއިން 10 ޕަސެންޓު ލެކްޗަރާއިން ޕީއެޗްޑީ ހާސިލްކޮށްފައި އޮންނަން ޖެހޭނެ ކަމަށް ވެސް އެ އިސްލާހުގައިވެއެވެ.
