ހަލަބޮލިވަމުންދާ މާހައުލެއްގައި އަވަށްޓެރި ގައުމުތަކާ ދުރުވެ، އަދި ބައިނަލްއަގުވާމީ މުޖުތަމައުން އެކަހެރިވެ ރާއްޖެ އަށް ރައްކާތެރިކަން ހޯދޭނެ ކަމަށް ހިތަށް އެރުން އެއީ ކޮށި ވިސްނުމެއް ކަމަށް ވިދާޅުވެ، ޑިފެންސް މިނިސްޓަރު މާރިޔާ އަހްމަދު ދީދީ، ކުރީގެ ރައީސް އަބްދުﷲ ޔާމީނަށް ނުސީދާކޮށް ފާޑު ވިދާޅުވެއްޖެއެވެ.
ސިފައިންނަށް 130 އަހަރު ފުރުން ފާހަގަކުރުމަށް ބޭއްވި ޖަލްސާގައި ވާހަކަ ދައްކަވަމުން މިނިސްޓަރު ވިދާޅުވީ، ދުނިޔޭގައި، އަދި ހާއްސަކޮށް ރާއްޖެ ހިމެނޭ އިންޑިއާ ކަނޑުގެ ސަރަހައްދުގައި ސަލާމަތީ މަސްރަހު ކުރިއަށް ވުރެ ބޮޑަށް ހަލަބޮލިވެ، ދިފާއީ ބޮޑެތި ބާރުތަކުގެ މެދުގައި އުފެދިފައިވާ ވާދަވެރިކަމާއި ނުތަނަވަސްވެރިކަމުގެ އަސަރުތައް ކުދި ގައުމުތަކަށް ވެސް ކުރަމުންދާ ކަމަށެވެ.
ވަކިން ހާއްސަކޮށް އަވަށްޓެރި އިންޑިއާ އާއި ޗައިނާގެ އިތުރުން، ބޮޑެތި އެހެނިހެން ގައުމުތަކުގެ ވާދަވެރިކަމާއި ނުތަނަވަސްވެރިކަމުގެ ސަބަބުން އެކަމުގެ އަސަރު ރާއްޖެ އަށް ކޮށް، ރާއްޖޭން ކުރިމަތިލާން ޖެހޭ ގޮންޖެހުންތައް ވެސް އިތުރުވަމުންދާ ކަމަށް މާރިޔާ ވިދާޅުވިއެވެ.
ރާއްޖޭގެ ދިފާއީ ސިޔާސަތުގައި ޑިފެންސް ޑިޕްލޮމަސީ ވަރަށް މުހިންމު ދައުރެއް އަދާކުރާ ކަން ފާހަގަކުރައްވައި، މާރިޔާ ވަނީ ނުސީދާ ގޮތެއްގައި ޔާމީނަށް ފާޑުވިދާޅުވެފައެވެ.
މާރިޔާ ވިދާޅުވީ، ރާއްޖެ އޮތް ސަރަހައްދުގެ ގޮތުން، ދުނިޔޭގެ ބޮޑެތި ބާރުތަކުން ރާއްޖެ އަށް ބަލާނެ ކަމަށެވެ.
އޭނާ ވިދާޅުވި ގޮތުގައި، ރާއްޖެ ވަށައިގެން ވަނީ ކަނޑު ކަމަށް ވީހިނދު، އަދި މުޅި ބޯޑަރަކީ ވެސް ކަނޑު ކަމަށްވާއިރު، ރާއްޖޭގެ ސަލާމަތާއި ރައްކާތެރިކަން ވަނީ ކަނޑާ ގުޅިފައެވެ. އެހެންކަމުން ރާއްޖޭގެ މިނިވަންކަމާއި ރައްކާތެރިކަން ކަށަވަރުކުރެވެން އޮތީ ދިވެހި ކަނޑުތަށް ބަލަހައްޓައި، ކަނޑުމަތީގެ ހާދިސާތަކާއި ކާރިސާތަކުން ދިވެހިން ސަލާމަތް ކުރެވިގެން ކަމަށް ވިދާޅުވިއެވެ.
ރާއްޖޭގައި ތިބި އިންޑިއާގެ ސިފައިން ބޭރުކުރުމަށް ގޮވާލައި، ޔާމީން އިސްވެ ހުންނަވައި އިދިކޮޅުން ހިންގާ "އިންޑިއާ އައުޓް" ހަރަކާތް މިހާރު ވަނީ މަޑުޖެހިފައެވެ. މި މަހުގެ 3 ގައި "ސަންގު ޓީވީ" އަށް ދެއްވި އިންޓަވިއުއެއްގައި ޔާމީން ވިދާޅުވީ، އެ ހަރަކާތް މަޑުޖެހުނީ ރައީސް އިބްރާހީމް މުހައްމަދު ސޯލިހު ނެރުއްވި ގަރާރުގެ ސަބަބުން ކަމަށެވެ.
އެ ހަރަކާތް ހުއްޓިފައި އޮތީ ގާނޫނީ ދަތިކަމުގެ ސަބަބުން ކަމަށާއި، އަދި އެ ގަރާރުގެ ސަބަބުން އިތުރު ހަމަނުޖެހުމަކަށް ދާން ބޭނުން ނުވާތީ ކަމަށް ވެސް އެމަނިކުފާނު ވިދާޅުވިއެވެ. ގާނޫނަށް އިހްތިރާމް ކުރުމުގެ ގޮތުން އިންޑިއާ އައުޓް ހަރަކާތް މަޑުޖައްސައިލި ކަމަށް ވިދާޅުވި ނަމަވެސް، ޔާމީން މީގެ ކުރިން ވިދާޅުވި ގޮތުގައި، ގާނޫނަކުން ވެސް އެ ހަރަކާތެއް ނުހުއްޓުވޭނެއެވެ.
މާރިޔާ މިފަހުން ފާހަގަ ވެފައި ވަނީ، ގިނަ ޖަލްސާތަކުގައި ޔާމީނަށް ފާޑުވިދާޅުވާ ވަޒީެއްގެ ގޮތުގައެވެ. މީގެ ކުރިން އޮތް މިފަދަ ޖަލްސާތަކުގައިވެސް މާރިޔާ ޔާމީނަށް ފާޑުވިދާޅުވެ ބަހުގެ ހަމަލާތައް ދެއްވާފައި ވެއެވެ.
ކަމަނާގެ ވިސްނުން ކޮށި ކަމުންނޫންތޯ މިހާތަނަށް ދައުލަތުގެ ވަޒީފާއެއް ރަގަޅަށް އަދާނުކުރެވުނީ!. އަދި ގާނޫނުއަސާސީ އާއި ދިވެހި ފުލުހުންނާއި ސިފައިންގެ އަގު ވައްޓާލީ.! އަދި ކުރީގެ ފިރިމީހާ ރައްޔިތުންގެ މުދަލާއި ފައިސާއިން ނުހައްގު މުއްސަދިކަންހޯދިއިރު އެފައިސާ ބޭނުންކުރުމަކީ ކުށެއްކަން ގާނޫނީ ވަކީލެއްގެ ހައިސިއްޔަތުން ރަގަޅަށް އެގިހުރެ ތިމާ އާއި އާއިލާގެ ބޭނުންތައް ފުއްދާ މަޖާކުރީ.