މަޖީދީމަގު ޔޫރޯ ސްޓޯރު ކައިރިން ފުލުހުންތަކަކަަށް ހަމަލާދިނީ ހެންވޭރުގެ މަޝްހޫރު ގޭންގަކުން ކަމަށާއި އެމައްސަލަ ސީރިއަސް މައްސަލައެއްގެ ގޮތުގައި ބަލާނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ސީޕީ ކުރެއްވި ޓުވީޓެއްގައި ވިދާޅުވީ، އެ 3 ފުލުހުންނަށް ހަމަލާ ދިނީ ހެންވޭރުގެ މަޝްހޫރު ގޭންގަކުން މިއަދު 11:52 ހާއިރު، އެމީހުން އޮފް ޑިއުޓީގައި އުޅެނިކޮށް ކަމަށެވެ.
މި ހާދިސާގައި އަނިޔާވި ފުލުހުންނަށް އޭޑީކޭގައި ފަރުވާދެމުން ދާއިރު އެމީހުންގެ ހާލު ބައްލަވާފައިވާ ކަމަށް ސީޕީ ވިދާޅުވިއެވެ.
ފުލުހުންތަކަކަަށް ހަމަލާދިން މައްސަލައިގައި ދެ މީހުން ފުލުހުންގެ ބެލުމުގެ ދަށަށް ގެންގޮސްފައިވާއިރު މި ހަމަލާ ދިނުމުގައި ހަރަކާތްތެރިވި އިތުރު މީހުން ހައްޔަރު ކުރައްވާނެ ކަމަށް ސީޕީ ވަނީ ފާހަގަ ކުރައްވާފައެވެ.
ސީޕީ އިތުރަށް ވިދާޅުވީ، މި މައްސަަލަ ވަރަށް ސީރިއަސްކޮށް ނަންގަވާނެ ކަމަށެވެ.
ރޭވިގެން ހިންގާ ކުށްތަކާއި މަސްތުވާތަކެތީގެ މައްސަލަތައް ހައްލުކުރުމަށް މިހާރަށް ވުރެ ފުޅާ، ހަރުދަނާ ނިޒާމެއް ގާއިމް ކުރަންޖެހޭ ސީޕީ ވަނީ ވިދާޅުވެފައެވެ. އަދި ފުލުހުންގެ ރައްކާތެރިކަމަށާއި އާންމުންގެ ސަލާމަތާއި ރައްކާތެރިކަން ކަަށަވަރުކުރުމަށް އިތުރު އެއްބާރުލުން ބޭނުންވާ ކަމަށް ހަމީދު ފާހަގަކުރެއްވިއެވެ.
އަނިޔާ ލިބުނު ފުލުހުންނަށް އޭޑީކޭގައި ފަރުވާ ދެމުންދާއިރު އެމީހުންނަށް ލިބުނު އަނިޔާގެ ތަފްސީލެއް ލިބިފައެއް ނުވެއެވެ. އެ މައްސަލަ ތަހްގީގު ކުރަމުންދާ ކަމަށް ފުލުހުން ބުނި އިރު ހަމަލާދިން ސަބަބު އަދި ސާފެއް ނުވެއެވެ.
