ބުޅަލުގެ އުނދަގޫ ބޮޑުވެ، ރައްޔިތުންގެ ޝަކުވާ ލިބެމުންދާތީ، މާލެ ސިޓީ ކައުންސިލްގެ ހަރަދުގައި ވިލިމާލޭގައި ވެޓް ކްލިނިކަކާ އެކު ބުޅާ ފެސިލިޓީ އެއް އިމާރާތްކުރަން ސިޓީ ކައުންސިލުން ފާސްކޮށްފިއެވެ.
މޭޔަރު ޑރ. މުހައްމަދު މުއިއްޒު ވިދާޅުވީ، ގާތްގަނޑަކަށް ފަސް މިލިއަން ރުފިޔާ ނުވަތަ އަށް މިލިއަން ރުފިޔާ ހަރަދުކޮށް ބުޅާ ފެސިލިޓީ އެއް ގާއިމްކުރުމުގެ ގާބިލްކަން ކައުންސިލްގެ ކިބައިގައި އެބަހުރި ކަމަށެވެ. ވިލިމާލޭގައި ބުޅާ ފެސިލިޓީ އެއް ގާއިމްކުރަން ނިންމާފައި ވަނީ މޭޔަރު ވިދާޅުވި ގޮތުގައި، މާލެއަކީ ތޮއްޖެހި، ބިމުގެ ދަތިކަން ކުރިމަތިވެފައިވާ ތަނަކަށް ވާތީއެވެ.
އެ މައްސަލައާ ބެހޭގޮތުން ކައުންސިލަރުން ވާހަކަ ދެއްކެވުމަށް ފަހު، ވިލިމާލޭގައި ބުޅާ ފެސިލިޓީ އެއް އިމާރާތްކުރަން ނިންމާފައި ވަނީ މިއަދުގެ ޖަލްސާ އަށް ހާޒިރުވި 13 ކައުންސިލަރުންގެ ތެރެއިން 12 ކައުންސިލަރުންގެ އިއްތިފާގުންނެވެ. ވިލިމާލޭގައި ބުޅާ ފެސިލިޓީ އިމާރާތްކުރަން ދެކޮޅު ހައްދަވާފައި ވަނީ އެ ދާއިރާގެ ކައުންސިލަރު ނަހުލާ އަލީއެވެ.
ނަހުލާ ވިދާޅުވީ، ބުޅަލުގެ ސަބަބުން މާލޭގައި އުނދަގޫ ބޮޑުވެފައިވާއިރު، އެ މައްސަލަ ވިލިމާލޭގައި ބޮޑު ކަން މީގެ ކުރިން ވެސް ފާހަގަކުރައްވާފައި ވާނެ ކަމަށެވެ. އޭނާ ވިދާޅުވި ގޮތުގައި، ވިލިމާލޭގައި މީގެ ކުރިން ވެޓް ކްލިނިކެއް ހުރި ނަމަވެސް، އެ ތަޖުރިބާ އެހާ ރަނގަޅެއް ނޫނެވެ. އަދި ވިލިމާލޭގެ އާންމުންގެ ތެރެއިން ގިނަ މީހުން ވެސް މިކަމަށް ދެކޮޅު ކަމަށް އޭނާ ވިދާޅުވިއެވެ.
ގަލޮޅު އުތުރު ދާއިރާގެ މެންބަރު މުހައްމަދު ސައިފް ފާތިހް ވިދާޅުވި ގޮތުގައި، ބުޅާ ފަދަ ޖަނަވާރުތައް އަމިއްލަ ހިތްހަމަޖެހުމަށްޓަކައި ގެންގުޅެމުންދާއިރު، އެ ތަކެއްޗަށް ފަރުވާ ކުރެވޭނެ ގޮތެއް އޮންނަން ވާނެއެވެ. އޭނާ ވިދާޅުވީ، މާލޭ ރައްޔިތުންގެ އާންމު ސިއްހަތަށް ގެއްލުންވާ ހިސާބަށް ބުޅަލުގެ ނަޖިހުގެ ކަންކަން ގޮސްފައިވާ ކަމަށެވެ.
ނަމަވެސް، ވެޓް ކްލިނިކެއް ހުރުމަކީ އެ ތަނެއްގައި ބުޅާ ގިނަވާނެ ސަބަބެއްނޫން ކަމަށާއި، ބުޅަލުގެ ނުރައްކަލެއް ވެސް އޮންނާނެ ކަމެއް ނޫން ކަމަށް، އޭނާ ވިދާޅުވިއެވެ.
މިއީ އަވަހަށް ހައްލުކުރަން ޖެހޭ މައްސަލައެއް ކަން ސައިފް ފާހަގަކުރެއްވިއެވެ.
"އެހެންވީމަ އެކަމުގެ ޝަކުވާ ކޮންމެ ދުވަހަކު ތަކުރާރުކޮށް އަޅުގަނޑުމެންނަށް ލިބެމުންދޭ." ސައިފް ވިދާޅުވިއެވެ.
ނަހުލާ ފިޔަވައި، ޖަލްސާގައި ވާހަކަ ދެއްކެވި އެހެނިހެން ކައުންސިލަރުން ވަނީ ވެޓް ކްލިނިކަކާ އެކު ވިލިމާލޭގައި ބުޅާ ފެސިލިޓީ އެއް އިމާރާތްކުރުމަށް ތާއީދުކުރައްވައިފައެވެ.
އަޅުގަނޑުވެސް ފާހަގަކުރަން. ކެޓް ޝެލްޓާ އަކީ އެންކްލޯޒް ކުރެވިފަ ހުންނަ، އެތަނުގެ ތެރޭގަ ޕްރޮފެޝަނަލުން ތިބެގެން އެ އެއްޗެހި ޓްރީޓްކޮށް ބަލަހައްޓާ ތަނެއް." މުއިއްޒު ވިދާޅުވިއެވެ.
ކުށްވެރިންނާ ބުޅަލުގެ އާބާދީ ބާރު ސްޕީޑްގައި އިތުރުވަމުން ދަނީ. ޚަރަދު ބަލަހައްޓަން މިޖެހެނީ ދިވެހި ޓެކްސްޕޭޔަރުންގެ ފައިސާއިން. މީ ކިހާ ދެރަވަރު ކަމެއްތޯ؟ މިއަށްވުރެ މާ ރަގަޅުވާނެ ބަކަރި ގެންގުޅޭ މަރުކަޒެއް އަޅައިގެން ބަކަރި ގެންގުޅުނަސް އޭރުން ބަކަރި އާއި ބަކަރި ކިރު ވިއްކައިގެން ކައުންސިލަށް އާމްދަނީ ލިބޭނެ ނޫންބާ……؟