އަނިޔާވެރިކޮށް މަރާލާފައި އޮއްވާ ރޭ ފެނުނު ޏ. ފުވައްމުލަކު، އުމުރުން 22 އަހަރުގެ ޝިއާއު މުހައްމަދު ސައީދު މަރާލާފައި އޮތީ ބޮލާއި ހަތަރެސްފައި ވެސް ވަކިކޮށްލާފައި ކަން އެނގިއްޖެއެވެ.
އެ މައްސަލައާ ގުޅިގެން ރާއްޖޭގެ ޒުވާން ސްކޭޓަރު އަލީ ޝާހިލް، 23 ފުލުހުންގެ ބެލުމުގެ ދަށަށް ރޭ ވަނީ ގެންގޮސްފައެވެ. އަދި އެ ދެމީހުނަކީ ކައިވެނިކޮށްގެން އުޅޭ ދެމީހުން ނޫން ކަމަށް ވަނީ ކަށަވަރުވެފައެެވެ.
ހ. ޝީރީންވިލާގެ އެޕާޓްމަންޓެއް ކުއްޔަށް ހިފައިގެން އެ ދެމީހުން ދިރިއުޅެމުން ދިޔައިރު ޝިއާއު މަރާލާފައި އޮއްވާ ފެނިފައި ވަނީ އެ މީހުން ދިރިއުޅެމުން ދިޔަ ކޮޓަރިން ކަމަށްވެސް މައުލޫމާތު ވަނީ ލިބިފައެވެ.
މައުލޫމާތު ލިބިފައިވާ ގޮތުގައި ޝިއާއުގެ ބޮލުގެ އިތުރުން ދެއަތުގެ އުޅަނބޮއްޓާ ހިސާބުން ބުރިކޮށްފައި ވާއިރު ދެ ފައި ވެސް އޮތީ ބުރިކޮށްފައެވެ. އަދި އެނގިފައިވާގޮތުން ޝިއާއު މަރާލުމުގެ ކުރިންވެސް ދެމީހުން ޒުވާބު ކުރާ އަޑު އެ ގޭތެރެއިން ވަނީ އިވިފައެވެ.
މި މައްސަލައިގައި ފުލުހުން ބުނެފައި ވަނީ އެ ސަރަހައްދުގައި ހަރަކާތްތެރި ވި ދިވެއްސަކު ހައްޔަރު ކޮށްފައިވާ ކަމަށާއި އެއީ ޝައްކު ކުރެވޭ މީހެއް ކަމަށެވެ. އޭނާ ހައްޔަރުކޮށްގެން ފުލުހުންގެ ވެހިކަލަށް އެރުވިއިރު ހުރީ ހަޒްމެޓް ސޫޓް ލައްވާފައެވެ. ނަމަވެސް އެއީ އޭނާ ހައްޔަރުކުރި އިރު ހުރިގޮތް ކަމެއް ނުވަތަ ފަހުން ފުލުހުން އޭނާ ގެންދަންވެގެން ލެއްވި ސޫޓެއް ކަމެއް ކަށަވަރެއް ނުވެއެވެ.
މައުލޫމާތު ލިބިފައިވާ ގޮތުގައި ފުލުހުން ޝާހިލް ހައްޔަރުކޮށްފައިވަނީ ލެއިން ތަތްތެޅިގެން ސިޑިމަތީ އިންދާ ކަމަށެވެ.
ޝިއާއުގެ ހަށިގަނޑު ފުލުހުން ބޮޑީ ބޭގަކަށް ލައިގެން ގެންދިޔައިރު ވަކި ދެ ބޭގެއް ގެންދިޔައެވެ. އަދި ޝިއާއުގެ ހަށިގަނޑު މިހާރު އޮތީ ގަލޮޅު މޯޗަރީގައެވެ.
