ރައީސް އިބްރާހިމް މުހައްމަދު ސޯލިހު ހެއްކާބެހޭ ބިލު މިއަދު ތަސްދީގު ކުރައްވައިފިއެވެ.
އެ ބިލަކީ މިދިޔަ ޖޫން 30 ގައި ބޭއްވި ރައްޔިތުން މަޖިލީހުގެ ޖަލްސާގައި ފާސްކުރެއްވި ބިލެކެވެ.
ހެއްކާބެހޭ ގާނޫނަކީ މަދަނީ މައްސަލަތަކާއި ޖިނާއީ މައްސަލަތަކުގައި ހެކިބަސް ނެގުމާއި ހެކި ހުށަހެޅުމާއި ހެކި ބަލައިގަތުމާއި ހެކި ވަޒަންކުރުމުގައި ތަބާވާންޖެހޭ އުސޫލުތަކާއި ކަމެއް ސާބިތުކުރުމަށް ހެކި ބޭނުންވާ ނިސްބަތާއި އެނޫންވެސް ހެއްކާބެހޭ އާންމު އުސޫލުތައް ކަނޑައެޅުމުގެ ގާނޫނެވެ. އަދި އެ ގާނޫނުގެ މަގުސަދުތަކުގެ ތެރޭގައި ގާނޫނު އަސާސީގެ 42 ވަނަ މާއްދާއިން ކަށަވަރުކޮށްދީފައިވާ އިންސާފުން ޝަރީއަތްކުރެވުމުގެ ހައްގު އެގޮތުގައި ކަށަވަރުކޮށްދިނުމަށް ބޭނުންވާ އަސާސީ އެއް އުސޫލު ކަމުގައިވާ ހެކީގެ އުސޫލު ތަފްސީލުކޮށް ގާނޫނުގައި ބަޔާންކޮށް، ކަނޑައަޅައިދިނުން ހިމެނެއެވެ.
އެ ބިލު ތަސްދީގުކުރައްްވާ މި ވަނީ މަސްދަރު ހާމަކުރުމަށް މަޖުބުރުވާ ގޮތަށް ހެއްކާ ބެހޭ ބިލްގައި މިހާރު ހިމަނާފައިވާ 136 ވަނަ މާއްދާ އިސްލާހުކުރުމަށް ގޮވާލާ "މަސްދަރު ހިމާޔަތް ކުރާނަން" ހަރަކާތުގެ ދަށުން 158 ނޫސްވެރިއަކު ސޮއިކޮ ޕެޓިޝަނެއް ހުށައަޅާފައިވެސް ވަނިކޮށެވެ.
އެ ބިލު ރައީސް މިއަދު ތަސްދީގުކުރެއްވުމާއި ގުޅިގެން ހެއްކާބެހޭ ގާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިއުކޮށްފައިވާއިރު އެ ގާނޫނަށް ޢަމަލުކުރަން ފެށުމަށް ހަމަޖެހިފައި ވަނީ އެ ގާނޫނު ފާސްވެ، ތަސްދީގުކޮށް، ދިވެހި ސަރުކާރުގެ ގެޒެޓުގައި ޝާއިއުކުރާ ދުވަހުން ފެށިގެން 6 މަސްދުވަސް ހަމަވާ ތާރީހުން ފެށިގެންނެވެ.
މީގެ އިތުރުން އެ ގާނޫނަށް އަމަލުކުރަން ފެށުމާއެކު ހެއްކާބެހޭ ގާނޫނާއި އަންހެނުންގެ ހެކިބަހުގެ ގާނޫނު އުވިގެން ދާނެއެވެ.
ނޫސްވެރިންގެ ހައްގުއޮތް ސަރުކާރޯ..