ރައީސް އިބްރާހީމް މުހައްމަދު ސޯލިހު، މަސްޖިދުއްނަބަވީ އަށް ރޭގެ ވަގުތެއްގައި ޒިޔާރަތް ކުރައްވައިފިއެވެ.
ހައްޖުގެ މަތިވެރި އަޅުކަން އަދާ ކުރެއްވުމަށްޓަކައި ރައީސާއި އަނބިކަނބަލުން ފަޒްނާ އަހްމަދު ސައުދީ އަށް ފުރާ ވަޑައިގެންނެވީ އިއްޔެ ހެނދުނުގެ ވަގުތެއްގައެވެ.
މަސްޖިދުއްނަބަވީ އަށް ރައީސް ރޭ ކުރެއްވި ޒިޔާރަތުގައި އެމަނިކުފާނަށް މަރުހަބާ ދެންނެވީ ދެ ހަރަމްފުޅު ބެލެހެއްޓުމުގެ ކަންކަމާ ދެވަނައަށް އެންމެ އިސްކޮށް ހަވާލުވެ ހުންނެވި ޑރ. މުހައްމަދު އަލް ޚުދައިރީއެވެ.
މަސްޖިދުއްނަބަވީ އަށް ކުރެއްވި ޒިޔާރަތުގައި ރައީސާ އެކު ރައީސް އޮފީހުގެ ޗީފް އޮފް ސްޓާފް އަލީ ޒާހިރާއި، ފުލުހުންގެ ކޮމިޝަނަރު މުހައްމަދު ހަމީދު ބައިވެރިވެ ވަޑައިގެންފައިވެއެވެ.
މި އަހަރު ހައްޖުގެ މަތިވެރި އަޅުކަން އަދާކުރުމަށް ރާއްޖޭން ފުރާ ހައްޖާޖީންގެ އެންމެ ފަހު ގްރޫޕާ ރައީސް ބައްދަލުކުރައްވާފައި ވަނީ މިދިޔަ ހޮނިހިރު ދުވަހުގެރޭ ވެލާނާ އެއާޕޯޓުންނެވެ.
ރާއްޖެއަށް މިއަހަރު ލިބުނު 453 ޖާގަ އެއްކޮށް އިސްލާމިކް މިނިސްޓްރީން ދިނީ ހައްޖު ކޯޕަރޭޝަނަށެވެ. ތިން ރެއަކަށް ބަހާލައިގެން ހައްޖާޖީން ފުރާފައިވާއިރު، އެންމެ ފަހު ގްރޫޕް ފުރާފައި ވަނީ މިދިޔަ ހޮނިހިރު ދުވަހުގެރެއެވެ.
