ކޮމަންވެލްތް ގައުމުތަކުގެ އިސްވެރިންގެ ރީޓްރީޓްގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ބައިވެރިވެވަޑައިގެންފިއެވެ.
ރައީސް އޮފީހުން ބުނީ، މި ރީޓްރީޓް ބާއްވާފައި ވަނީ ރުވާންޑާގެ އިންޓެއާ ކޮންފަރެންސް އެރީނާގައި ކަމަށެވެ.
ދެ ސެޝަނަށް ބަހާލައިގެން ކުރިއަށް ގެންދިޔަ މި ރީޓްރީޓްގެ ފުރަތަމަ ސެޝަން އަމާޒުކޮށްފައި ވަނީ ޒުވާނުންނާއި، ޓެކްނޮލޮޖީއާއި، އީޖާދީކަމުގެ މައްޗަށް ކަމަށް ރައީސް އޮފީހުން ބުނެއެވެ. އަދި ދެ ވަނަ ސެޝަން އަމާޒު ކޮށްފައިވަނީ ބައިނަލްއަގްވާމީ ގޮތުން ކުރިމަތިވާ އެކި ގޮންޖެހުންތަކަށް ކަމަށް ރައީސް އޮ އޮފީހުން ވަނީ ބުނެފައެވެ.
ރައީސުލްޖުމްހޫރިއްޔާ ރުވާންޑާއަށް ވަޑައިގެންނެވީ ކޮމަންވެލްތުގެ ގައުމުތަކުގެ އެންމެ އިސްވެރިންގެ 26 ވަނަ ބައްދަލުވުމުގައި ބައިވެރިވެވަޑައިގެންނެވުމަށެވެ.
ރައީސް އޮފީހުން ބުނީ މިއީ 2020 ވަނަ އަހަރުގެ ފެބްރުއަރީ 1 ވަނަ ދުވަހު ދިވެހިރާއްޖެ އަލުން ކޮމަންވެލްތުގެ މެންބަރު ގައުމަކަށް ވީފަހުން ބާއްވާ، ކޮމަންވެލްތުގެ ގަމުތަކުގެ އެންމެ އިސްވެރިންގެ ފުރަތަމަ ބައްދަލުވުން ކަމަށެވެ.
މިބައްދަލުވުން މިބާއްވަނީ ކޯވިޑް-19ގެ އާލަމީ ވަބާ އާ ގުޅިގެން ބައްދަލުވުން ފަސްކުރުމަށް ފަހުގައެވެ. ކޮމަންވެލްތް ޤައުމުތަކުގެ އިސްވެރިންގެ މިއަހަރުގެ ބައްދަލުވުމުގެ ޝިއާރަކީ "ޑެލިވަރިން އަ ކޮމަން ފިއުޗާ: ކަނެކްޓިން، އިނޮވޭޓިން، ޓްރާންސްފޯމިން" މިއެވެ.
ރުވާންޑާގައި ބޭއްވި ބައްދަލުވުން މިހާރު ވަނީ ނިންމާލައިފައެވެ. ނަމަވެސް ރައީސް އަދި މާލެ ވަޑައެއް ނުގަންނަވައެވެ.
