އަންނަ އަހަރު، ރާއްޖޭގެ ރިޒާވް ހުސްވެ، ދަރަނި ނުދެއްކޭ ހިސާބަށް ދިއުމުގެ ފުރުސަތު ބޮޑު، ރާއްޖެއަށް ބޮޑުކަމަށް، އެމެރިކާގެ އިންވެސްޓްމެންޓް ބޭންކެއް ކަމަށްވާ ޖޭޕީ މޯގަނުން ބުނެފިއެވެ.
އެ ބޭންކުން ކުރި ދިރާސާއަކުން ދެއްކި ގޮތުގައި، ރަޝިއާ އާއި ޔޫކްރައިނާ ދެމެދު މިހާރު ހިނގަމުންދާ ހަނގުރާމައިގެ ސަބަބުން އިގްތިސޯދަށް އަންނަ ބަދަލުތަކާ ހެދި، ތަރައްގީވަމުން އަންނަ ގައުމުތަކުގެ ތެރެއިން ބޮޑެތި ދަރަނިތައް ނަގާފައިވާ ގައުމުތަކުގެ ތެރެއިން 10 ޕަސެންޓު ގައުމުތަކުގެ އިގްތިސޯދަށް ބޮޑެތި އަސަރުތައް ކުރާނެއެވެ. އެ ދިރާސާގައި ފާހަގަކޮށްފައިވާ ކަންކަމަށް ބަލާލާއިރު:
- ލޯނުތަކުގެ އިންޓްރަސްޓް ބޮޑުވާނެ
- ތަރައްގީވަމުން އަންނަ އިގްތިސޯދުތަކުން ދަރަނި ދެއްކުމަށް ދަތިތަކާ ކުރިމަތިވާނެ
- ގައުމަށް ވަންނަ ފައިސާއަށް ވުރެ ބޭރުވާ ފައިސާ އިތުރުވެ، ފަރަގު ބޮޑުވާނެ
- އަސާސީ ތަކެތީގެ އަގު އުފުލިގެން ދާނެ
ޖޭޕީ މޯގަންގެ ދިރާސާގައި އަލިއަޅުވާލާފައިވާ 52 ގައުމަށް ވެސް ވަނީ ދަރަނި ދެއްކުމުގައި ދަތިތަކާ ކުރިމަތިވެފައެވެ. އޭގެ ތެރެއިން އަށް ގައުމެއްގެ ރިޒާވް ހުސްވެ، ދަރަނި ނުދެއްކޭ ހިސާބަށް އަށް ގައުމެއް ދާނެ ކަމަށް ބުނެފައިވެއެވެ. ރާއްޖޭގެ އިތުރުން އެ ލިސްޓުގައިވާ ގައުމުތަކަކީ:
- ބަހާމާސް
- ބެލީޒް
- ސެނެގާލް
- ރުވާންޑާ
- ގްރާނާޑާ
- އިތޯޕިއާ
- ސްރީ ލަންކާ
ސޮވެރިން ގެރެންޓީ ހިމަނައިގެން މިއަހަރު ނިމޭއިރު ރާއްޖޭގެ ދަރަނި 103 ބިލިއަން ރުފިޔާއަށް އުފުލޭނެ ކަމަށް، މަރުކަޒީ ބޭންކް އެމްއެމްއޭއިން ލަފާކޮށްފައިވެއެވެ. ހަރަދަށް ޒިންމާވާ ގާނޫނުގައިވާ ގޮތުން، ރާއްޖޭގެ ދަރަނި ހުންނަންވާނީ އުފެއްދުންތެރިކަމުގެ ނިސްބަތުން 60 ޕަސެންޓުގައެވެ. ނަމަވެސް މިހާރު ދަރަނި ހުރީ އުފެއްދުންތެރިކަމުގެ ނިސްބަތުގެ 117 ޕަސެންޓުގައެވެ.
ރަޝިއާ އާއި ޔޫކްރައިން ހަނގުރާމައިގެ ސަބަބުން ރާއްޖޭގެ އިގްތިސޯދު ނާޒުކު ވެފައިވާ ކަމަށާއި، ދަރަނި މެނޭޖުކުރެވޭނެ ގޮތްތަކެއް ހޯދަން ވޯލްޑް ބޭންކުން ރާއްޖެއަށް މީގެ ކުރިން ގޮވާލާފައިވެއެވެ. އަދި ބޮޑެތި މަޝްރޫއުތައް މަޑުޖައްސާލަން ވެސް ވޯލްޑް ބޭންކުން އިލްތިމާސްކޮށްފައިވެއެވެ.
އަހަރަމެންގެ ރައީސް އިބޫ ވިލް ސޭވް އަސް އޯކޭ!! މުޅި ރާއްޖޭގެ ތާރީހުގައި މިހާތަނަށް ނާންނަވަރުގެ ތަރައްގީ ގެންނަވާ ކޮވިޑުން ސަލާމްތް ކޮށްދެއްވި ރައީސް އިނގޭތޯ! ހިކުމަތްތެރި އޯގާތެރި ވިސްނުންފުޅުތޫނު ރައީސް އިބޫ! ޖޭޕީ މޯގަން ދޭ މަހަށް!