މަނީ ލޯންޑަރިންގެ ބޮޑު ތުހުމަތެއް ކުރެވޭ މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސްގެ މަގާމުގައި ހުންނެވި ޝަހުބާން ފަހުމީގެ މައްސަލަ ރައްޔިތުން މަޖިލީހުގެ މިނިވަން މުއައްސަސާތަކާ ބެހޭ ކޮމެޓީ އަށް މިއަދު ހުށަހަޅައިފިއެވެ.
އެ ކޮމެޓީގެ މެމްބަރު އަދި ވިލިމާލެ ދާއިރާގެ މެމްބަރު އަހްމަދު އުޝާމް ބަައެއް މީޑިއާތަކަށް ވިދާޅުވީ މުޖުތަމައު ގަބޫލުކުރާ މިންގަނޑު އަބުރުވެރިކަމާއި އަހުލާގު ރަނގަޅު މީހެއް ކަމަށް ވުމަކީ މީޑިއާ ކައުންސިލްގެ މެމްބަރުކަމުގެ ސިފަތަކުގެ ތެރޭގައި ގާނޫނުގައި ހިމެނޭ ކަމަށްވާއިރު ޝަހުބާން މިހާރު އެއާ ހިލާފުވެފައިވާ ކަމަށް ބެލެވޭ ކަމަށެވެ.
އެ ކައުންސިލްގެ ރައީސްގެ މަގާމު ހުސްވަނީ ދައުރު ހަމަވުމުން، އިސްތިއުފާދިނުމުން، ކައުންސިލުގެ މެމްބަރުކަމުން ވަކިކުރުން، މަރުވުމުން ނުވަތަ މެމްބަރެއްގައި ހުރުމަށް އެ ގާނޫނު ލާޒިމުކުރާ ސިފައެއް އުނިވުމުނެވެ.
ކިންގްސް ފޮރެކްސް ޓްރޭޑިން ކުންފުނިން ގާނޫނާ ހިލާފަށް އިންވެސްޓްމަންޓް ސްކީމެއް ހަދައި އޮޅުވާލައިގެން ގިނަ އަދަދެއްގެ ފައިސާ ހޯދުމާއި އެ ފައިސާ ލޯންޑާކުރާ ކަމުގެ ތުހުމަތު ޝަހުބާންގެ އިތުރުން އޭނާގެ ބޭބެ، ފޭދޫ ދާއިރާގެ ކުރީގެ މެމްބަރު އަލްހާން ފަހުމީ އަށް ވެސް ކުރެއެވެ.
އެ މައްސަލާގައި ފުލުހުން މީގެ ކުރިން ވަނީ އަލްހާންގެ ވިޔަފާރީގައި ބައިވެރިވި ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމްގެ މައްޗަށް ވެސް މަނީ ލޯންޑަރިންގެ ތުހުމަތުކޮށް ފުލުހަށް ހާޒިރުކޮށްފައެވެ. އެއީ މީގެ ތިން އަހަރު ކުރިން ހައިލަމްގެ އެކައުންޓަށް 200،000 ރުފިޔާ ފޮނުވި މައްސަލައިގައި ކަމަށް ފުލުހުން އޭރު ބުނެފައިވެއެވެ.
