ކޮވިޑް-19 އަށް ފަހު، ކުރިއަށް އޮތް ދުވަސްތަކުގައި ދުނިޔެއަށް ކުރިމަތިވެދާނެ މިފަދަ ބޮޑެތި ކާރިސާތަކުން ރައްކާތެރިވުމަށް ދުރާލާ މަސައްކަތް ކުރަން ޖެހޭ ކަމަށް، ހެލްތު މިނިސްޓްރީގެ ސްޓޭޓް މިނިސްޓަރު ޑރ. ޝާހު އަބްދުﷲ މާހިރު ވިދާޅުވެއްޖެއެވެ.
މިހާރު ވާޗުއަލްކޮށް ކުރިއަށްދާ ކޮމަންވެލްތު ހެލްތު މިނިސްޓަރުންގެ ބައްދަލުވުމުގައި މި އަހަރުގެ މައުޟޫއު ކަމަށްވާ "ދަ ރޯޑް ޓު ކޯވިޑް-19 ރިކަވަރީ - ލެސަން ލާންޓް ފޯ ބިލްޑިން ހެލްތު ސިސްޓަމް ރެސިލިއަންސް ޓު އެޑްވާންސް ޔުނިވާސަލް ހެލްތު ކަވަރޭޖް އެންޑް ގްލޯބަލް ހެލްތު ސެކިއުރިޓީ އިން ދަ ކޮމަންވެލްތު" އަށް ވާހަކަ ދައްކަވަމުން މިނިސްޓަރު ވަނީ ރާއްޖޭން ކޮވިޑުން އަރައިގަތުމަށްޓަކައި ކުރި މަސައްކަތް ފާހަގަ ކުރައްވައި، ކޮވިޑު ފަދަ ބަލިތަކުން އަރައިގަތުމަށްޓަކައި އަޅަން ޖެހޭ މުހިންމު ބައެއް ފިޔަވަޅުތަކާ މެދު ވާހަކަ ދައްކަވާފައެވެ. ޝާހު ދެއްކެވި ވާހަކައިގައި:
- ކޮވިޑުގެ ސަބަބުން ކުދި ފަންތީގެ ގައުމުތަކާއި މެދު ފަންތީގެ ގައުމުތަކުގެ އިގްތިސޯދަށް ކުރިމަތިވި ނޭދެވޭ އަސަރުތައް ފާހަގަ ކުރައްވާފައިވޭ
- އެ އަސަރުތަކާއި ހުރަސްތަކުން އަރައި ގަންނަން ޖެހޭ ކަމަށް ވިދާޅުވި
- އެފަދަ ކާރިސާތަކުން ރައްކާތެރިވުމަށް ދުރާލާ މަސައްކަތް ކުރަން ޖެހޭ ކަމަށް ވެސް ވިދާޅުވި
މިނިސްޓަރު ޝާހުގެ އިތުރުން، އެ ބައްދަލުވުމުގައި ބައިވެރިވެ ވަޑައިގަތް ޑިރެކްޓާ ޖެނެރަލް އޮފް ހެލްތު ސާވިސަސް ޑރ. އަހްމަދު އަޝްރަފް ވަނީ ކޮވިޑުން ދިފާއުވުމަށްޓަކައި ރާއްޖޭން އަމަލުކުރި ގޮތާއި، އާބާދީ އަށް ވެކްސިން ފޯރުކޮށްދިނުމަށް ކުރި މަސައްކަތްތަކާއި، ކޮވިޑާ ގުޅިގެން ކުރެވުނު ތަޖުރިބާތައް ހިއްސާ ކުރައްވައިފައެވެ.
އޭގެ އިތުރުން، މި ބައްދަލުވުމުގެ ބްރޭކްއައުޓް ސެޝަންގައި ރާއްޖެއާއި ކޮމަންވެލްތުގެ އެހެނިހެން ގައުމުތަކުން ވެސް ވަނީ ކޮވިޑުގެ ހާލަތު މެނޭޖު ކުރަމުން ދާ ގޮތާއި، އެފަދަ ކާރިސާތަކުގައި ދިފާއީ ނިޒާމް ވަރުގަދަ ކުރުމަށްޓަކައި އަޅަން ޖެހޭ ފިޔަވަޅުތަކާއި، ކޮވިޑުން ރައްކާތެރިވުމަށްޓަކައި އެކުލަވާލާފައިވާ ސްޓްރެޓަޖިކް އެކްޝަން ޕްލޭން ފަދަ މައުލޫމާތުތައް ހިއްސާކޮށްފައެވެ.
މި ހަފްތާގެ އަންގާރަ ދުވަހުން ބުރާސްފަތި ދުވަހަށް ބާއްވާ މި ބައްދަލުވުމުގައި މިނިސްޓަރު ޝާހާއި ޑރ. އަޝްރަފްގެ އިތުރުން، ދެން ބައިވެރިވެ ވަޑައިގަންނަވަނީ ހެލްތު މިނިސްޓްރީގެ އެސިސްޓަންޓް ޑިރެކްޓާ ފާތިމަތު ލިމްޔާއެވެ.
ހެލްތު މިނިސްޓްރީން ބުނީ، މި ބައްދަލުވުމުގައި ކޮމަންވެލްތުގެ ގައުމުތަކުގެ ހެލްތު މިނިސްޓަރުންނާއި ސިއްހީ ދާއިރާގެ އިސް ފަރާތްތަކާ ދެމެދު ސިއްޙަތާ ބެހޭ ގޮތުން މުހިންމު މަޝްވަރާތައް ކުރެވޭނެ ކަމަށާއި، ބައްދަލުވުން ނިމިގެން ދާނީ މި ބައްދަލުވުމުގެ މައުޟޫއާ ގުޅޭ ’މިނިސްޓީރިއަލް އައުޓްކަމް ސްޓޭޓްމަންޓް‘ އަށް ކޮމަންވެލްތުގެ ހެލްތު މިނިސްޓަރުންގެ މެދުގައި އެއްބަސްވެވަޑައިގަތުމަށް ފަހުގައި ކަމަށެވެ.
ކުރިއަށްއޮތްތާގައި އަންނަންހުރި ކާރިސާތަކާއި އަންނާނެ އެންގަލާއި އެއިގެ ވެއިޓޭޖުގެ އިތުރުން ލިބޭނެ ގެއްލުމުގެ މިންވަރާއި އަންނާނެ ތާރީހްތައް ބުނެލަދީ ޑރ ބުނުމުން ކުފުރުގެ ބަހެއް ނުބުނެވޭތޯ ބަލާތި