މިހާރު ރާއްޖެއަށް ކުރަމުންދާ ވިއްސާރައިގައި މާލެއަށް އުދައަރައި ކާނުގަނޑެއްގެ ތެރެއިން ވެނެއް ނިކުމެ އުޅޭ ވީޑިއޯއެއް އާންމުވެއްޖެއެވެ.

މައުލޫމާތު ލިބިފައިވާ ގޮތުގައި އެއީ އައިޖީއެމްއެޗް ކައިރީ އޮތް ކާނުގަނޑެކެވެ. އާންމުވެފައިވާ ވީޑިއޯއިން ފެންނަނީ މޫދުގައި އުޅޭ ބާވަތުގެ ވެނެއް އެ ކާނުގަނޑު ތެރެއިން ނިކުމެ އުޅޭ މަންޒަރެވެ. އަދި އެ ވެން އަނބުރާ ކާނުގަނޑުގެ ތެރެއަށް ވަންނަ ތަން ވެސް އެ ވީޑިއޯއިން ފެނެއެވެ.

އެ ވެނުގެ ދިގުމިނުގައި ގާތްގަނޑަކަށް 3 ފޫޓު ވަރު ހުންނާނެ ކަމަށް ލަފާ ކުރެވެއެވެ.

https://youtu.be/YPh_OWELNaA

މިއަދު މާލެއަށް ދޭތެރެ ދޭތެރެއިން ވާރޭ ވެހެމުންދާ އިރު ވަރަށް ބާރަށް ވައި ވެސް އަންނަނީ ޖެހެމުންނެވެ. މާލެއަށް ކުރާ ވިއްސާރައިގައި ބައެއް މަގުތަކުގައި ފެން ހެދިފައިވާ އިރު އައިޖީއެމްއެޗް ހިސާބުގައި ވެސް ވަނީ ފެން ބޮޑުވެފައެވެ.

އުދަ އަރަމުން އަންނަ އިރު ސިނާއީ ސަރަހައްދާއި އައިޖީއެމްއެޗް ބިއްދޮށަށް މިއަދު ވަނީ އުދައަރާފައެވެ.

މިހާރު ކުރަމުންދާ ވިއްސާރައާ ގުޅިގެން މޫސުމާ ބެހޭ އިދާރާއިން ބުނީ، ހއ. އިން ވ އަތޮޅާ ދެމެދަށް ބޯކޮށް ވާރޭވެހުމާއެކު ގުގުރާނެ ކަމަށެވެ. ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވެ ކަނޑުތައް ގަދަވާނެ ކަމަށް އެ އިދާރާއިން ލަފާކޮށް މިރޭ 12:15 އާ ހަމައަށް ވަނީ ވައިޓް އެލާޓް ނެރެފައެވެ.

މި ވިއްސާރައާ ގުޅިގެން މޫސުމާ ބެހޭ އިދާރާއާއި، އެމްއެންޑީއެފް އަދި ޑިސާސްޓާ މެނޭޖްމަންޓުން ވަނީ ކަނޑުދަތުރުފަތުރު ކުރުމުގައި ސމާލުވުމަށް އިލްތިމާސް ކޮށްފައެވެ.

ހަބަރު މާލެ ސިޓީ މޫސުން