މިސްކިތަށް ކުޑަކަމުގޮސް، އަދި އޭގެ ފަހުން ހަތިމަށް ކުޅު ޖަހައިގެން ހައްޔަރުކުރި މ. ޝޭޑީހޯމް ހަސަން ޒިޔާދު، އާންމު ތަނެއްގައި ބަރަހަނާ ހާލުގައި އޮއްވައި ހައްޔަރުކުރުމަށް ފަހު، ދޫކޮށްލައިފިއެވެ.
އެ މައްސަލާގައި ޒިޔާދު ހައްޔަރުކޮށްފައި ވަނީ މިދިޔަ މަހު 21 ވަނަ ދުވަހު މަސްވެރިންގެ ޕާކުގައި ބަރަހަނާ ހާލުގައި މޫދަށް އެރި އޮއްވައެވެ. އޭނާ ހައްޔަރުކުރީ އާންމު މަސްލަހަތަށް ގެއްލުން ހުރި އަމަލެއް ކުރި ކަމުގެ ތުހުމަތުގައި ކަމަށް ފުލުހުން ވަނީ ބުނެފައެވެ.
އޭރު ޒިޔާދުގެ ބަންދަށް 15 ދުވަސް ޖެހިއިރު އޭނާގެ ބަންދުގެ މުއްދަތު މި މަހުގެ ހަތްވަނަ ދުވަހަށް ހަމަވާނެއެވެ. ނަމަވެސް ބަންދާ މެދު އިތުރު ގޮތެއް ނިންމަން ފުލުހުން އޭނާ ކްރިމިނަލް ކޯޓަށް ހާޒިރުު ކޮށްފައިނުވާ ކަމަށް ކޯޓުން ވަނީ ބުނެފައެވެ.
މިއީ އޭނާ ހައްޔަރުކުރި ތިންވަނަ ފަހަރެވެ.
ޒިޔާދު އެންމެ ފުރަތަމަ ފަހަރަށް ހައްޔަރުކޮށްފައި ވަނީ މިދިޔަ ނޮވެމްބަރު މަހު ރައީސް އޮފީހުގެ ޣޭޓަށާއި އިސްލާމީ މަރުކަޒުގެ ތެރެއަށް ކުޑަކަމުދިޔަ މައްސަލާގައެވެ. އޭގެ ފަހުން މަޖީދިއްޔާ ސްކޫލް ކައިރީ ހުންނަ އިބްރާހީމް އިސްކަންދަރު މިސްކިތުގެ ހަރިންމައިގެ ތެރެއަށް ކުޑަކަމު ގޮސް ހަތިމަށް ކުޅު ޖެހުމުން، އެތަނުގައި ތިބި ބައެއް އާންމުން އޭނާ ހުއްޓުވައި ނަސޭހަތް ދީފައި ވެއެވެ.
އޭގެ އިތުރުން، މަޖީދީމަގުގައި ހުންނަ ކެފޭއަކަށްވެސް އޭނާ ގެއްލުން ދީފައި ވާއިރު، ފުލުހުން އޭރު ބުނި ގޮތުގައި ޒިޔާދުގެ ނަފްސާނީ ބައްޔެއް ހުރެއެވެ. ނަމަވެސް ޖެންޑާ މިނިސްޓްރީން ބުނީ އޭނާ އަށް ބޭނުންވަނީ މަސްތުވާތަކެތީގެ ފަރުވާ ކަމަށެވެ.
