އޮންލައިންކޮށް ބަނޑޭރި ޕޯޓަލް މެދުވެރިކޮށް ރަމަޟާންމަހުގެ އެންމެ ފަހު ދުވަހުގެ އިރުއޮއްސި 6 ޖަހަންދެން ފިތުރު ޒަކާތް ދެއްކޭނެ ކަމަށް އިސްލާމިކް މިނިސްޓްރީއިން ބުނެފިއެވެ.
މި އަހަރު ރޯދަ މަހުގެ 26 ވަނަ ދުވަހުގެ ނިޔަލަށް ފިތުރު ޒަކާތުގެ ގޮތުގައި 5,583,326.44 ރުފިޔާ އެ މިނިސްޓްރީއަށް ލިބިފައިވާއިރު މި މަހުގެ 28 ވަނަ ދުވަހުގެ ނިޔަލަށް މިނިސްޓްރީގެ ވެބްސައިޓުންނާއި ދިރާގުގެ ދިރާގުޕޭ، އެސްއެމްއެސް، އުރީދޫގެ އެމްފައިސާ، އެސްއެމްއެސް، މޯލްޑިވްސް އިސްލާމިކް ބޭންކްގެ ފައިސާ މޮބައިލް، ބޭންކް އޮފް މޯލްޑިވްސް ޕޯޓަލް، ފަހި ޕޭ މެދުވެރިކޮށް ފިތުރު ޒަކާތް ދެއްކޭނި އިންތިޒާމު ހަމަޖެއްސިއެވެ.
އިސްލާމިކް މިނިސްޓްރީއިން ބުނީ ރަމަޟާންމަހުގެ އެންމެ ފަހު ދުވަހާ ހަމައަށް ޒަކާތް ދެއްކޭނީ މިނިސްޓްރީގެ ކައުންޓަރުތަކުންނާއި ބަނޑޭރި ޕޯޓަލް މެދުވެރިކޮށް ކަމަށެވެ.
އެގޮތުން އެ މިނިސްޓްރީން ފިތުރު ޒަކާތް ބަލައިގަތުމަށް ހަމަޖެހިފައިވަނީ މިއަދު ހެނދުނު 10 އިން ހަވީރު 5:15 އަދި މާދަމާއަކީ އީދު ދުވަސް ކަމުގައި ނުވެއްޖެ ނަމަ މާދަމާ ހެދުނު 10 އިން މެންދުރު 12 އަށެވެ. އަދި ގޮވާމުން ޒަކާތް ބެހުން މިރޭ 9 އިން 10:30 އަދި މާދަމާ އީދު ދުވަހަށް ނުވެއްޖެނަމަ ހެނދުނު 10 އިން މެންދުރު 12 އަށެވެ.
މީގެ އިތުރުން މިނިސްޓްރީގެ ކައުންޓަރުން ފިތުރު ޒަކާތް ބަލައިގަތުމަށް މިއަދު ހެނދުނު 10 އިން ހަވީރު 5:15 އަށް ހަމަޖެހިފައިވާއިރު އީދު ދުވަހަށް ނުވާނަމަ މާދަމާ ހެނދުނު 10 އިން 12 އަށް ކަމަށް އެ މިނިސްޓްރީއިން ބުނެއެވެ.
