އެސްޓީއޯގެ 2022 ވަނަ އަހަރުގެ ފުރަތަމަ ކުއާޓާގައި ސާފު ފައިދާގެ ގޮތުގައި 150 މިލިއަން ރުފިޔާ ލިބިއްޖެއެވެ.
މި އަހަރުގެ ފުރަތަމަ ކުއާޓާގެ ފައިދާގެ ގޮތުގައި އެސްޓީއޯއަށް 177 މިލިއަން ރުފިޔާ ލިބިފައިވާއިރު މިއީ އޭގެ ކުރީ ކުއާޓާއާއި އަޅާބަލާއިރު 15 ޕަސެންޓްގެ އިތިރުވުމެކެވެ. އަދި ޓެކްސްއަށް ކެނޑުމަށްފަހު މި ކުއާޓާގެ ސާފު ފައިދާއަކީ 150 މިލިއަން ރުފިޔާއެވެ. މިއީ އޭގެ ކުރީ ކުއާޓާ އާއި އަޅާބަަލާއިރު 14 ފަސެންޓްގެ އިތުުރުވުމެކެވެ.
ނިމިދިޔަ ކުއާޓާގައި އެސްޓީއޯގެ ޖުމްލަ އާމްދަނީ އަކީ 4 ބިލިއަން ރުފިޔާއެވެ. މިއާއެކު މިދިޔަ ކުއާޓާގެ މި އަދަދަވުރެ 23 ޕަސެންޓް ވަނީ އިތުރުވެފައެވެ. އެސްޓީއޯއިން ބުނީ އާމްދަނީ އިތުރުވުމުގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގު މައްޗަށް ދިޔުމާއެކު އެސްޓީއޯއިން ވިއްކި ތެލުގެ އަދަދު އޭގެ ކުރީ ކުއާޓާއާ އަޅާބަލާއިރު 14 ޕަސެންޓް އިތުރުވުން ކަމަށާއި ކުންފުނިން ކުރަމުންގެންދާ އެހެނިހެން ވިޔަފާރިތައް ކުރިއަރާ، ވިޔަފާރިތަކުން ލިބުނު އާމްދަނީ އިތުރުވުން ކަމަށެވެ.
ކުންފުންޏަށް ލިބުނު އާމްދަނީ އިތުރުވުމާއެކު، ޖުމްލަ ފައިދާ ވަނީ އޭގެ ކުރީ ކުއާޓާއާއި އަޅާބަލާއިރު، 71.6 މިލިއަން ރުފިޔާ އިތުރުވެފައެވެ. މިއީ އޭގެ ކުރީ ކުއާޓާއާއި އަޅާބަލާއިރު 18 އިންސައްތައިގެ ކުރިއެރުމެކެވެ.
ދުނިޔޭގެ ބާޒާރުގައި ތެލުގެ އަގުތައް ބޮޑުވިނަމަވެސް އެ ނިސްބަތުން އެސްޓީއޯއިން ތެލުގެ އަގުތައް ބޮޑުކޮށްފައިނުވާނެކަން ފާހަގަކޮށް އެ ކުންފުނިން ބުނީ ރޯދަމަހަށް ހާއްސަކޮށް ރައްޔިތުންނަށް ބޭނުންވާ ތަކެތި އެތެރެކޮށް ހެޔޮ އަގުގައި ފޯރުކޮށްދިނުމަށް އިސްކަން ދީފައިވާނެ ކަމަށެވެ. އަދި އެސްޓީއޯ ޕީޕަލްސް ޗޮއިސްއިން ދެމުން ގެންދިޔަ ހިދުމަތްތައް ފުޅާކޮށް، ތަފާތު މުދަލާއެކު މިދިޔަ މަހުގެ 13 ވަނަ ދުވަހު އެ ކުންފުނީގެ އާ ޑިޕާޓްމަންޓް ސްޓޯއެއް ހުޅުވާފައިވާ ކަމަށެވެ.
އެސްޓީއޯއިން ބުނީ އެ ކުންފުނީގެ ހިންގުމުގެ ހަރަދު މި ކުއާޓާގައި ވަނީ އޭގެ ކުރީ ކުއާޓާއާއި އަޅާބަލާއިރު ގާތްގަނޑަކަށް 10 އިތުރުވެފައިވާ ކަމަށާއި އެކަމުގެ މައިގަނޑު ސަބަބަކީ ޕްރޮވިޝަން އިތުރުވުން ކަމަށެވެ.
