އދ. ފެންފުށީގެ ފެނުގެ ނިޒާމު ގާއިމް ކުރުމުގެ އަމަލީ މަސައްކަތް ފަށައިފިއެވެ.
ފެނަކައިން ބުނީ، ރަސްމީކޮށް މި މަސައްކަތް ފައްޓަވައިދެއްވީ ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހްމަދު ސައީދު މުހައްމަދާއި މިނިސްޓާ އޮފް ސްޓޭޓް ފޯ ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ އަކްރަމް ކަމާލުއްދީން ކަމަށެވެ.
ފެނުގެ ނިޒާމް ގާއިމް ކުރުމުގެ މަޝްރޫއުގެ ދަށުން، ކުރިއަށް އޮތް 6 މަސްތެރޭ، ހޮޅި ވަޅުލައި، ސާފުކޮށް، ޕްރެޝާ ޓެސްޓް ކޮށް، ގޭގެއަށް ކަނެކްޝަން ދިނުމުގެ އެންމެހާ މަސައްކަތް ކުރާނެ ކަމަށް ފެނަކައިން ބުނެއެވެ.
މިގޮތުން 9600 މީޓަރަށްވުރެ ދިގު ފެނުގެ ވިއުގައެއް ގާއިމްކޮށް، 60 ޓަނުގެ 02 ފެންޕްލާންޓް ބަހައްޓައި، 950 ޓަނުގެ ފެން ރައްކާކުރެވޭނެ ވަސީލަތް ގާއިމްކޮށް، ރަށުގެ ހުރިހާ ގެއަކަށް ފެން މީޓަރު ގުޅައިދޭނެ ކަމަށް ފެނަކައިން ވަނީ ބުނެފައެވެ.
ފެނަކައިން ބުނީ، މި މަޝްރޫއަކީ ދިވެހި ސަރުކާރުގެ ފަރާތުން، ޕްލޭނިން މިނިސްޓްރީން، މި އަހަރުގެ ޑިސެމްބަރު ގެ ނިޔަލަށް ނިންމުމަށް އެކުންފުންޏާ ހަވާލު ކޮށްފައިވާ މަޝްރޫއެއް ކަމަށެވެ.
ފެނަކައިން މަސައްކަތް ކުރަނީ މަޝްރޫއުގެ މަސައްކަތް އެއްކޮށް ނިންމައި، ނޮވެމްބަރު މަހު މިނިސްޓްރީ އާ ފެނުގެ ނިޒާމު ހަވާލުކުރުން ކަމަށް އެކުންފުނިން ބުނެއެވެ.
