ބްލެކް މާކެޓްގައި ބޭރު ފައިސާގެ ވިޔަފާރި ކުރުމާއި އަދި ރާއްޖެ އިން ބޭރަށް ގިނަ އަދަދެއްގެ ފައިސާ ފޮނުވައިގެން މަނީ ލޯންޑާކުރި ކަމަށް ތުހުމަތުކޮށް، މަލްޓިލީފް ނަމަކަށް ކިޔާ ކުންފުންޏެއްގެ ބޭންކް އެކައުންޓްތަކެއް ހިފަހައްޓާފައި ވަނިކޮށް، އެ އެކައުންޓްތައް ދޫކޮށްލަން ހައި ކޯޓުން އަމުރު ކޮށްފިއެވެ.
ރާއްޖޭގައި ރަޖިސްޓްރީ ކޮށްފައިވާ ކުންފުނިތަކެއް ބޭނުންކޮށްގެން ކަޅު ބާޒާރުގައި ބޭރު ފައިސާއިން ވިޔަފާރިި ކުރުމާއި އަދި ވަކި ކުންފުންޏެއްގެ އެކައުންޓްތައް ބޭނުންކޮށްގެން ގިނަ އަދަދެއްގެ ފައިސާ ރާއްޖެ އިން ބޭރަށް ފޮނުވާ ކަމަށް ތުހުމަތުކޮށް މަލްޓިލީފްގެ ފަސް އެކައުންޓެއް ތިން މަސް ދުވަހަށް ހިފަހައްޓަން މިދިޔަ ފެބްރުއަރީ މަހު ކްރިމިނަލް ކޯޓުން ވަނީ އަމުރު ކޮށްފައެވެ. ދެން އެ ކުންފުނިން ވަނީ ހައިކޯޓުގައި އެ މައްސަލަ އިސްތިއުނާފް ކޮށްފައެވެ.
ހައި ކޯޓުން މިދިޔަ ހަފުތާގައި ކުރި ހުކުމުގައި ވަނީ، މަލްޓިލީޕްގެ ހުރިހާ އެކައުންޓްތަކެއް ހިފެހެއްޓިއިރު، އެ ހުރިހާ އެކައުންޓްތަކެއްގައި ހުރީ ކުށްކޮށްގެން ހޯދި ފައިސާ ކަމަށް ބުނެދެވިފައި ނުވާ ކަމަށާއި، އަދި ކުށްކޮށްގެން ހޯދި ކަމަށް ލަފާކުރެވޭ ވަރަކީ ކޮބައި ކަމެއް ނުވަތަ ހުރިހާ ފައިސާއަކީ ކުށް ކޮށްގެން ހޯދި އެއްޗެއް ކަމަށް ތުހުމަތު ކުރި ސަބަބެއް އަދި މަނީ ލޯންޑްރިންގެ ކުށާ އެކަމާ ގުޅޭ ގޮތެއް ވެސް ދެއްކިފައި ނުވާ ކަމަށެވެ. އެހެންކަމުން އެ ކުންފުނީގެ އެކައުންޓްތައް ހިފަހައްޓަން އެދުނީ މަނީ ލޯންޑާ ކުރުމުގެ ތުހުމަތުގައި ކަމަށް ވިޔަސް، އަމުރަށް އެދިފައި އޮތީ މަނީ ލޯންޑްރިންގެ ގާނޫނުގެ ދަށުން ނޫން ކަމަށް ހައިކޯޓުން ބުނެއެވެ. އަދި އެ އަމުރު އޮތީ އެކައުންޓްތައް ހިފަހައްޓަން އަމުރު ނެރުމާ ބެހޭގޮތުން ސުޕްރީމް ކޯޓުން ކުރިން ނިންމާފައިވާ ނިންމުންތަކާ ވެސް ހިލާފަށް ކަމަށް ހައި ކޯޓުން ބުނެއެވެ.
މި މައްސަލައިގައި، ދަށު ކޯޓުގެ އަމުރު ގޯސް ކަމަށް ދައުލަތުން ވެސް ކޯޓުގައި ވަނީ އެއްބަސްވެފައެވެ. އެ އަމުރު ގޯސް ކަމަށް ދައުލަތުން އެއްބަސްވާތީ، އެ އަމުރު ބާތިލް ކުރަން ޖެހޭ ކަމަށް ހައިކޯޓުން ކުރި ހުކުމުގައި ބުނެފައި ވެއެވެ.
