ދިވެހިރާއްޖެއަށް މަސްތުވާތަކެތި އެތެރެކޮށް މަސްތުވާތަކެތީގެ ވިޔަފާރި ކުރާކަމަށް ލިބުނު މައުލޫމާތަކާ ގުޅިގެން ފުލުހުންގެ ޑްރަގް އެންފޯސްމަންޓް ޑިޕާޓްމަންޓާއި ނާކޮޓިކްސް އިންޓެލިޖެންސް ޑިޕާޓްމަންޓް ގުޅިގެން ހިންގި އޮޕަރޭޝަނެއްގައި 42 ކީލޯގެ މަސްތުވާތަކެތި ހޯދައި ހައްޔަރު ކުރި 2 މީހުންގެ ވަނަވަރު ހާމަ ކޮށްފިއެވެ.
މާޗް 24، 2022 އަދި 25 ވަނަ ދުވަހު ހިންގި މި އޮޕަރޭޝަންގައި ހައްޔަރުކޮށްފައި ވަނީ ކ. މާލެ، ދަފްތަރު ނަންބަރު ރސ 3840، އަހްމަދު ހުސައިން (39އ) އާއި ކ. މާލެ، މ. ނޫރުއް، އަބްދުﷲ ނަޝީދު (46އ) އެވެ.
އެމީހުން ހައްޔަރުކުރި އޮޕަރޭޝަންގައި މާލޭގެ ދެ ގެއަކާއި އަމިއްލަ އޮފީހެއް ބަލައި ފާސްކޮށްފައި ވެއެވެ.
އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން އަބްދުﷲ ނަޝީދުގެ ބަންދަށް 15 ދުވަސް އަދި އަހްމަދު ހުސައިންގެ ބަންދަށް 10 ދުވަސް ދީފައި ވާ ކަމަށް ފުލުހުން ބުނެއެވެ.
މާލޭގެ މާފަންނުގައި ހުންނަ މ. ލަވްނެސްޓުގެ ކޮޓަރިއެއްގެ ތަޅުން ދަށުން 42 ކިލޯގެ މަސްތުވާތަކެތި ފެނުނު މައްސަލައިގައި ފުރަތަމަ ހައްޔަރު ކުރީ އަބްދުﷲ ނަޝީދެވެ. އޭރު 2 ވަނަ މީހާ، ޕީއެންސީގެ ކައުންސިލް މެންބަރަކަށް އޭރު ހުރި އަހްމަދު ހުސައިން އުޅުނީ ފިލައިގެންނެވެ.
މިހާރު އޭނާ ކައުންސިލުން ވަކިކޮށްފައި ވާއިރު، އޭނާ ބަންދު މަޖިލީހުގައި ބުނެފައި ވަނީ، އޭނާއާ މެދު ބަޔަކު މައްސަލަ ޖައްސާފައި ވަނީ އޭނާއަށް ދެރައެއް ދިނުމުގެ ގޮތުން ކަމަށެވެ.
