މ. ލަވް ނެސްޓުގެ ކޮޓަރިއެއްގެ ތަޅުން ދަށުގައި ފޮރުވާފައި ހުރި މަސްތުވާ ތަކެއްޗާ ގުޅޭ އިސް މީހާ ފުލުހުން ހައްޔަރު ކޮށްފިއެވެ.
ކޮމިޝަނަރު މުހައްމަސު ހަމީދު އެކަން ފާހަގަ ކުރައްވާ ޓްވީޓް ކުރައްވަމުން ވިދާޅުވެފައި ވަނީ، އެ މަސްތުވާތަކެއްޗާ ގުޅޭ އިސް މީހާ އަތުލެވިއްޖެ ކަމަށެވެ. އެމީހާގެ ވަނަވަރު ފުލުހުން ހާމަ ނުކުރި ނަމަވެސް، އެއީ ސިޔާސީ ޕާޓީއެއްގެ އެކްޓިވިސްޓެއް ކަމަށް މައުލޫމާތު ލިބެއެވެ.
ފުލުހުން ރޭ ހިންގި އޮޕަރޭޝަނެއްގައި 42 ކިލޯ ހޯދާފައި ވާއިރު، ރޭވެސް އެކަކު ހައްޔަރު ކުރިއެވެ. އެމީހާގެ ވަނަވަރެއްވެސް ފުލުހުން ހާމައެއް ނުކުރެއެވެ. ނަމަވެސް އެ އޮޕަރޭޝަން ހިންގަން އެ ގޭގެ ކޮޓަރީގެ ތަޅުން ތަޅާފައި އޮތް ތަނާއި، މަސްތުވާތަކެތި ނަގާ އަތުރާފައި ހުރި ތަނާއި، ތަޅުމުގެ ދަށުގައި ބިމު އަޑިއަށް ހަދާފައި ހުރި ވަޅުބުރިއެއްގެ ފޮޓޯ އާންމު ކުރިއެވެ.
މަސްތުވާތަކެއްޗާ ދެކޮޅަށް ފުލުހުން ހިންގަމުން އަންނަ އޮޕަރޭޝަން ތަކުގައި ގިނަ އަދަދެއްގެ މަސްތުވާތަކެތި ދޭތެރެ ދޭތެރެއިން އަތުލައިގަނެއެވެ. އެގޮތުން މިމަހުގެ 20 ވަނަ ދުވަހުގެ ރޭ ވެސް ޕިކަޕަކަށް އަރުވަގެން ގެންދަނިކޮށް ސޯސަން މަގުން ހުއްޓުވާ ފުލުހުން ވަނީ 17 ކިލޯގެ މަސްތުވާތަކެތި އަތުލައިގެންފައެވެ. އަދި މި މަހުގެ 11 ވަނަ ދުވަހު ފުލުހުންވަނީ 12 ކިލޯގެ މަސްތުވާތަކެތި އަތުލައިގެން 3 މީހަކު ހައްޔަރުވެސްކޮށްފައެވެ.
ގިނަ އަދަދުން މަސްތުވާތަކެތި އަތުލައިގެން ނަމަވެސް އެ މައްސަލަތަކުގައި ފުލުހުން ކަން ކުރާ ގޮތުން، ނުވަތަ ޗެއިން އޮފް ކަސްޓަޑީ ގޯސްވެގެން ގިނަފަހަރަށް މައްސަލަތައް ސާބިތެއް ނުވެއެވެ. ކޯޓު މަރުހަލާ ތަކުގައި ތުހުމަތުވާ އެންމެން ގިނަ ފަހަރު ހުރީ ދޫވެފައެވެ.
