ރޭ ޕިކަޕަކަށް އަރުވައިގެން ގެންދަނިކޮށް އަތުލައިގެންފައިވަނީ ވައިގެ މަގުން ރާއްޖެއަށް އެތެރެކުރި 17 ކިލޯގެ މަސްތުވާތަކެތި ކަމަށް ފުލުހުން ބުނެފިއެވެ.
ޕިކަޕަކަށް އަރުވައިގެން ގެންދަނިކޮށް، ފުލުހުން މަސްތުވާތަކެތި އަތުލައިގެންފައިވަނީ ސޯސަން މަގުން، ރޭ އިރާކޮޅުގެ ވަގުތެއްގައެވެ. ފުލުހުން ވަނީ އެ ޕިކަޕު ހުއްޓުވުމަށްފަހު، އޭގައި ހުރި މަސްތުވާތަކެތީގެ ޕެކެޓުތައް މަގުމަތީގައި އަތުރައި، ޕިކަޕު ބަލައި ފާސްކޮށްފައެވެ.
މިކަމާ ގުޅިގެން ފުލުހުން މިއަދު ބުނީ، މަސްތުވާތަކެއްޗާއެކު ރޭ ހަތަރު މީހަކު ހައްޔަރުކޮށްފައިވާ ކަމަށާއި، މަސްތުވާތަކެއްޗާއެކު އެ މީހުން އަތުލައިގެންފައިވަނީ ވައިގެ މަގުން ރާއްޖެއަށް މަސްތުވާތަކެތި އެތެރެކޮށްފައިވާ ކަމަށް ކަސްޓަމްސް އިން ދިން މައުލޫމާތަކާ ގުޅިގެން، ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ހިންގި އޮޕަރޭޝަނެއްގައި ކަމަށެވެ.
އެ މައްސަލާގައި 17 ކިލޯގެ މަސްތުވާތަކެއްޗާއެކު ފުލުހުންގެ ބެލުމުގެ ދަށަށް ގެންގޮސްފައިވަނީ 27 އަހަރާއި 37 އަހަރާ ދެމެދުގެ ދެ ދިވެހި ފިރިހެނުންނާއި ދެ ބަންގްލަދޭޝް ފިރިހެނުންނެވެ.
ފުލުހުން ދަނީ އެ މައްސަލަ އިތުރަށް ތަހްގީގު ކުރަމުންނެވެ.
