އަންހެނުންނާއި ޒުވާނުންނަށް ޖާގަ ތަނަވަސްކޮށްދިނުމުގެ ވައުދާއެކު އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) މެނިފެސްޓޯ ނެރެފިއެވެ.
އިންތިގެ ކެމްޕޭން މެނިފެސްޓޯ އިއުލާން ކޮށްފައިވަނީ މިރޭ ގދ. ތިނަދޫގައި ބޭއްވި ޖަލްސާއެއްގައެވެ.
މެނިފެސްޓޯގައި މައިގަނޑު 4 ވައުދެއް ހިމެނެއެވެ. އޭގެތެރޭގައި ހިމެނޭ ޕާޓީގެ ދަފްތަރު ސާފުކުރުމާއި ލާމަރުކަޒީ ނިޒާމާއި ޕާޓީގެ އޮނިގަނޑު އެއްގޮތްކުރުމާއި އެމްޑީޕީގެ ބަސް ވިކޭކަން ކަށަވަރުކުރުމުގެ އިތުރުން އަންހެނުންނާއި ޒުވާނުންނަށް ޖާގަ ތަނަވަސްކޮށްދިނުމެވެ.
ޕާޓީގެ ދަފްތަރު ސާފުކުރުމުގެ ތެރޭގައި އިލެކްޝަންސް ކޮމިޝަންގައި އެހެން ޕާޓީއެއްގައި ދަފްތަރުވެފައި ވާނަމަ އެމްޑީޕީގެ އެތެރޭގެ އިންތިހާބުތަކުގައި ވޯޓު ނުލެވޭނެކަން ކަށަވަރުކުރުމާއި ޕާޓީގެ ދަފްތަރު އިތުބާރު ހިފޭ އިންތިޒާމެއް ގާއިމުކުުރުމުގެ އިތުރުން ޕާޓީގެ ކަންކަން އެނގޭ މޯބައިލް އެޕްލިކޭޝަނެއް ތައާރަފްކުރުމުން ހިމެނެއެވެ.
ލާމަރުކަޒީ ނިޒާމާއި ޕާޓީގެ އޮނިގަނޑު އެއްގޮތްކުރުމުގެ ވައުދުގައި އަތޮޅާއި ސިޓީގެ މަޖިލިސް އެފެއްދުން ހިމެނެއެވެ.
އެމްޑީޕީއަށް ދައުލަތުން ލިބޭ ފައިސާ ރަށްރަށާއި އަތޮޅާއި ދާއިރާތަކުން ބަހާލުމުގައި އަންހެނުންގެ ރޫހަށާއި ޒުވާނުންގެ ހިތްވަރަށް ޕާޓީއިން ބަޖެޓެއް އެކަށައަޅެމުނަށް އިންތި ވަނީ ވައުދުވެވަޑައިގެންފަައެވެ.
އަންނަ މެއި މަހުގެ 14 ވަނަ ދުވަހު ބާއްވާ އެމްޑީޕީގެ ޗެއާޕާސަންގެ އިންތިހާބުގައި އިންތިގެ އިތުރަށް ދެން ވާދަކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލްއެވެ.
