ޑްރަގް އެންފޯސްމަންޓާއި އިންޓެލިޖެންސް ގުޅިގެން ކަނޑުމަތީގައި ރޭ ހިންގި މަސްތުވާތަކެތީގެ އޮޕަރޭޝަނެއްގައި އަތުލައިގެން މަސްތުވާތަކެއްޗާ ގުޅުން ހުރި ކަމަށްބުނެ ހައްޔަރުކުރި ކަމުގެ އަޑުތައް ފެތުރުނު ފިލްމީ ތަރި ހުސައިން ސޮބާހު އެކަން ދޮގުކޮށްފިއެވެ.
12 ކިލޯގެ މަސްތުވާތަކެއްޗާއެކު ފުރަތަމަ ހައްޔަރުކުރީ އިންޑިއާ ފިރިހެނެކެވެ. އަދި އެކަމުގައި ގުޅުން ހުރި ކަމަށް ތުހުމަތުކުރެވޭ ދިވެއްސަކާއި ބަންގްލަދޭޝް މީހަކު ރޭ ހައްޔަރުކޮށްފައި ވާއިރު އެ މީހުންނަށް ވަނީ މުއްދަތުވެސް ޖަހާފައެވެ.
ސޯސަލް މީޑިއާގައި ވަނީ އެ މައްސަލައިގައި ހައްޔަރުކުރި ދިވެއްސަކީ ސޮބާހު ކަމަށް ބުނެ އަޑުތައް ފެތުރިފައެވެ. އެހެންނަމަވެސް އޭނާ ވަނީ އޭނާ ހައްޔަރު ނުކުރާކަން ހާމަކޮށްފައެވެ.
ކަން ހިނގައިދިޔަގޮތް އޮޅުންފިލުވުމަށް މީހަކު ސޮބާހުއާ ސުވާލުކުރަމުން ނަގާފައިވާ ވީޑިއޯއެއް ސޯސަލްމީޑިއާގައި ދައުރުވާން ފަށާފައި ވާއިރު އެ ވީޑިއޯގައި ސޮބާހު ބުނެފައި ވަނީ އޭނާ ފުލުހުންގެ ބެލުމުގެ ދަށަށް ގެންދިޔައީ ސުވާލުތަކެއް ކުރަން ކަމަށާއި ސަބަބަކީ މަސްތުވާތަކެތި ފެނުނު ލޯންޗަކީ އޭނާގެ ލޯންޗަކަށް ވާތީ ކަމަށެވެ.
ސޮބާހު ބުނީ އެ ލޯންޗު 46،800 ރުފިޔާއަށް ކުއްޔަށް ހިފީ އޭނާ ދަންނަ ބައެއް ކަމަށާއި ލޯންޗު ކުއްޔަށް ނެގީ ށ. އަތޮޅަށް ދިއުމަށް ކަމަށް ބުނެ ކަމަށެވެ. އަދި ލޯންޗުގެ އިންޖީނެއް ހަލާކުވެގެން ސޮބާހުއާ ގުޅަމުން ދިޔަ ކަމަށާއި 3 ދުވަސް ފަހުން ރޭ ހުޅުމާލެ ފަޅަށް ލޯންޗު ވަންތޯ ބަލަން ދިޔައީ ދަތުރު ހަވާލުކުރި މީހާއާ އެއްކޮން ކަމަށް ވެސް ސޮބާހު ވަނީ ބުނެފައެވެ.
ސޮބާހު ބުނީ އެތަނަށް ދިޔަ އިރު ފުލުހުން ތިބި ކަމަށާއި އޭނާ އާ އެކަމާއި ގުޅޭގޮތުން ސުވާލު ކުރުމުން ކަން ހިނގާދިޔަ ގޮތް ކިޔައިދީފައި ވާނެ ކަމަށެވެ. އަދި ފުލުހުންގެ ބެލުމުގެ ދަށަށް ގެންދިޔައީ ސުވާލު ކުރުމަށް 4 ގަޑިއިރަށް ކަމަށެވެ.
