މަސްތުވާތަކެތި އެތެރެކޮށް ވިޔަފާރިކުރުމުގެ ތުހުމަތުތަކާ ގުޅިގެން މީގެ ތިން އަހަރު ކުރިން ހުޅުމާލޭގެ އެޕާޓްމެންޓެއް ބަލައި ފާސްކުރިއިރު މަސްތުވާތަކެތި ފެނުނު މައްސަލައެއްގައި ހެކި ހޯދާފައިވަނީ ރަނގަޅަށް ކަމަށް ހައިކޯޓުން ނިންމައިފިއެވެ.
އެ މައްސަލަ އާ ގުޅިގެން، އެ އެޕާޓްމެންޓުގައި ދިރިއުޅެމުން ދިޔަ ދެމަފިރިންގެ މައްޗަށް ޑައިމޯފިން ޓްރެފިކްކުރުމުގެ ދައުވާ ދައުލަތުން އުފުލާފައިވާއިރު، އެ މައްސަލާގައި ހޯދި ހެކިތައް ބަލައިނުގަނެވޭނެ ކަމަށް ބުނެ، އެ ދެ މީހުން ވަނީ އެޕާޓްމެންޓް ފާސްކުރުމުގެ އަމުރު ބާތިލްކަމަށް ބުނެ، ޝަރީއަތުގެ ކުރީގެ ހުށަހެޅުމެއް ހުށަހަޅާފައެވެ.
ނަމަވެސް، ހުޅުމާލެ ކޯޓުން އެޕާޓްމެންޓް ފާސްކުރަން އަމުރު ދިން އިރު، އެ ކޯޓަކީ އެފަދަ އަމުރުތައް ނެރުމުގެ އިހްތިސޯސް އޮތް ކޯޓެއް ނޫނެވެ. އޭރު އެފަދަ އެހެން މައްސަލަތަކުގައިވެސް އެ ކޯޓުން ނެރުނު އަމުރުތައް ބާތިލްކުރިކަން ފާހަގަކޮށް އެ ދެމަފިރިންގެ ފަރާތުން އެދުނީ ހުޅުމާލެ ކޯޓުގެ އަމުރުގެ ދަށުން ހޯދި ހެކިތަކަކީ ގާނޫނާ ހިލާފަށް ހޯދި ހެކިތަކެއްކަން ނިންމައި ދިނުމަށެވެ. ނަމަވެސް ހުޅުމާލެ ކޯޓުން އޭރު ނެރުނު އަމުރު ހައިކޯޓުން ބާތިލެއް ނުކުރެއެވެ.
އެހެންވެ، ހުޅުމާލެ ކޯޓުން ނިންމި ނިންމުމުގައިވާ ގޮތުން، އެ އަމުރުގެ ދަށުން ހޯދި ހެކިތައް ގާނޫނާ ހިލާފު ހެކިތަކެއް ކަމަށް ނުނިންމޭނެއެވެ. އެ ދެމަފިރިން މިދިޔަ ބުދަ ދުވަހު އެ ނިންމުން ހައިކޯޓުގައި އިސްތިއުނާފު ކުރުމުން މިދިޔަ ބުދަ ދުވަހު ހައިކޯޓުން ކުރި ހުކުމުގައި ބުނީ އަމުރެއް ބާތިލްނުކުރާ ހިނދެއްގައި އެ އަމުރު ދެމި އޮންނާނެ ކަމަށާއި، އެފަދަ އަމުރެއްގެ ދަށުން ހޯދާފައިވާ ހެކިތައް ގޯސްވާން ޖެހޭ ސަބަބެއް އެ ދެމަފިރިންނަށް ނުދެއްކުނު ކަމަށެވެ.
އެހެންކަމުން، ހުޅުމާލެ ކޯޓުގެ ނިންމުމަށް ބަދަލު ގެންނަންޖެހޭ ސަބަބެއް ނެތް ކަމަށާއި، އެޕާޓްމެންޓް ފާސްކުރަން ދިން އަމުރުގެ ސައްހަކަމާ މެދު ހައިކޯޓަށް މިހާރު ގޮތެއް ނުނިންމޭނެ ކަމަށް، ހައިކޯޓުން ކުރި ހުކުމުގައިވެއެވެ.
