ކޮވިޑް 19 އިން ދިފާއުވުމަށްޓަކައި އެމެރިކާ ސަރުކާރުން ރާއްޖެއަށް ފައިޒާ ވެކްސިން ހަދިޔާ ކޮށްފިއެވެ.
ކޮވެކްސް ފެސިލިޓީ މެދުވެރިކޮށް މިއަދު އެމެރިކާއިން ރާއްޖެއަށް ހަދިޔާކޮށްފައި ވަނީ 210،000 ޑޯޒުގެ ވެކްސިނާއި ސިރިންޖެވެ.
އެމެރިކާއަކީ ކޮވިޑްގެ ދުވަސްކޮޅު ރާއްޖެއަށް ވަރަށް ގިނަ އެހީތައް ވެދީފައިވާ ގައުމެކެވެ. އެގޮތުން މިހާތަނަށް އެގައުމުން ވަނީ ރާއްޖެއަށް 440،000 ޑޯޒްގެ ފައިޒާ ވެކްސިނާއި ކުއްލި ހާލަތުގައި ބޭނުން ކުރަން ހަތް މިލިއަން ޑޮލަރުގެ ވަސީލަތްތަކާއި ތަމްރީނާއި ހިދުމަތްތައް ފޯރުކޮށްދީފައެވެ.
މީގެ އިތުރުން 60 ވެންޓިލޭޓަރާއި އެއް ލައްކަ ރެޕިޑް ޑައިގްނޯސްޓިކް ޓެސްޓު ވެސް ހަދިޔާކޮށްފައި ވާއިރު މަދަނީ ޖަމިއްޔާތަކާއި ގުޅިގެން އިޖުތިމާއީ ރައްކާތެރިކަން އިތުރު ކުރުމަށް ކުރާ މަސައްކަތަށް ވެސް ވަނީ އެހީތެރިވެދީފައެވެ.
އެމެރިކާއިން ރާއްޖެއަށް ދެލައްކައަށް ވުރެ ގިނަ ވެކްސިން ޑޯޒު ހަދިޔާ ކޮށްފައި ވާއިރު، މިވަގުތު ރާއްޖޭގައި ވަނީ ވެކްސިންގެ ބޫސްޓާ ޑޯޒު ޖަހަން ފަށާފައެވެ. އެގޮތުން މިހާތަނަށް 62،000 އަށް ވުރެ ގިނަ މީހުން ބޫސްޓާ ޑޯޒު ޖަހާފައިވާ ކަމަށް އެޗްޕީއޭއިން ވަނީ ބުނެފައެވެ.
