ކަނޑައެޅިގެން ވަކި ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19)ގެ އޮމިކްރޯން ވޭރިއަންޓްގެ ބިޔަ ރާޅު، ދުނިޔޭގެ އެކި ހިސާބުތަކަށް ބިންދާލާ، ރެކޯޑް އަދަދުތަކުން ކޭސްތައް ރިޕޯޓް ކުރަމުން ދާ މި ދަނޑިވަޅުގައި، ފުރާނައަށް އިންތިހާ ނުރައްކާތެރި، އަދި އެހާމެ ހަލުވި ދުވެލީގައި ފެތުރިގެންދާ އާ ވޭރިއަންޓެއްގެ އިންޒާރު، ޗައިނާގެ ސައެންސްވެރިންގެ ގުރޫޕަކުން ދީފިއެވެ.
ކޮވިޑް-19ގެ ކޭސްތައް، 2019 ވަނަ އަހަރުގެ ފަހުކޮޅު އެންމެ ފުރަތަމަ ރިޕޯޓް ކުރަން ފެށި، ޗައިނާގެ ވޫހާން ސިޓީގެ ސައެންސްވެރިން އިންޒާރު ކޮށްފައި ވާ އާ ވޭރިއަންޓަށް ދީ ފައި ވާ ނަމަކީ، "ނިއޯކޮވް"އެވެ.
ރަޝިއާގެ ހަބަރު ފަތުރާ ސްޕަޓްނިކްއާ ހަވާލާދީ ބައިނަލްއަގުވާމީ މީޑިއާއިން ރިޕޯޓް ކޮށްފައި ވާ ގޮތުގައި، ނިއޯކޮވް ވޭރިއަންޓް އެންމެ ފުރަތަމަ ފެނިފައި ވަނީ ދެކުނު އެފްރިކާއިންނެވެ. އަދި މި ވޭރިއަންޓަކީ، މާސްކޮވް އާއިލާއާ ގުޅުން އޮތް ވޭރިއަންޓެއް ކަމަށްވެސް މައުލޫމާތު ލިބެއެވެ. މާސްކޮވް ރޯގާއަކީ، 2012 އާއި 2015 ވަނަ އަހަރާ ދެމެދު، މެދުރިއުމަތީގެ ގައުމުތަކުން ފެނުނު ރޯގާއެކެވެ.
އަދި ނިއޯކޮވްއަކީ، ކޮވިޑް-19 ޖައްސާ، ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސްކޮވް-2) އާ ވެސް އެއްގޮތް ވޭރިއަންޓެއް ކަމަށް މައުލޫމާތު ލިބެއެވެ. ސައެންސްވެރިން ބުނާ ގޮތުގައި ނިއޯކޮވް ފެނިފައި ވަނީ، ވާލުގެ އާބާދީއިންނެވެ.
ނިއޯކޮވް ވޭރިއަންޓްގައި މީހުން މަރުވާނެ ގޮތް ލަފާ ކުރަމުން ޗައިނާގެ ރިސާޗަރުން ވަނީ، މި ވޭރިއަންޓަށް އިންފެކްޓްވާ ކޮންމެ 3 މީހަކުން 1 މަރުވާނެ ކަމުގެ އިންޒާރު ދީފައެވެ.
ރަޝިއާގެ ތަޖުރިބާކާރުން ވަނީ ނިއޯކޮވްއާ ގުޅޭ ދިރާސާތަކެއް ހަދާފައެވެ. ދިރާސާތަކަށް ފަހު، ރަޝިއާގެ ސްޓޭޓް ވައިރޮލޮޖީ އެންޑް ބައޮޓެކްނޮލޮޖީ ރިސާޗް ސެންޓަރުން އާންމު ކުރި ބަޔާނެއްގައި ބުނެފައި ވަނީ، ނިއޯކޮވްއާ ގުޅިގެން ޗައިނާގެ ރިސާޗަރުންނަށް މައުލޫމާތު ލިބިފައި ވާ ކަން ރަޝިއާގެ ރިސާޗް ސެންޓަރަށް އެނގޭ ކަމަށެވެ. އަދި މިއީ އިންސާނުންގެ މެދުގައި ފެތުރިގެންދާ ކޮރޯނާވައިރަހުގެ އާ ރޯގާއެއްގެ ފެށުން ނޫން ކަމަށްވެސް ބުނެފައި ވެއެވެ.
ނަމަވެސް، ނުރައްކާތަކެއްގެ އިންޒާރު، ތަޖުރިބާކާރުން ވަނީ ދެއްވާފައެވެ. އެގޮތުން އިތުރު ދިރާސަތަކާ ތަހުލީލުތައް ކުރަން ޖެހޭ ކަމަށް ތަޖުރިބާކާރުން ވަނީ ވިދާޅުވެފައެވެ.
އަޅެ ފަހެ، އެފްރިކާއިން ވާ ކެއުން ހުއްޓައެއް ނުލާތަ؟