ކޮވިޑް ކޭސްތައް އިތުރުވަމުން ދާ މި ދަނޑިވަޅުގައި ރާއްޖޭގެ އެކި ސަރަހައްދުގައި ނަގަމުންދާ ސާމްޕަލްތައް، އެއް ރަށުން އަނެއް ރަށަށް އުފުލުމަށް 13 ސްޕީޑް ބޯޓު ސަޕްލައި ކޮށްދޭނެ ފަރާތެއް ހޯދަން އިއުލާން ކޮށްފިއެވެ.
ފިނޭންސް މިނިސްޓްރީން ބުނީ، ދިވެހި ސަރުކާރުން، ވޯލްޑް ބޭންކްގެ އެހީގައި ހިންގަމުންދާ "ކޮވިޑް-19 އެމަޖެންސީ ރެސްޕޮންސް އެންޑް ހެލްތު ސިސްޓަމް ޕްރިޕެއާޑްނަސް ޕްރޮޖެކްޓް" ގެ ދަށުން ހެލްޓް މިނިސްޓްރީގެ ބޭނުމަށް ސާމްޕަލް ޓްރާންސްފާ ކުރުމަށް 13 ސްޕީޑް ބޯޓު ސަޕްލައި ކޮށްދޭނެ ފަރާތެއް ހޯދަން ބޭނުންވާ ކަމަށެވެ.
މި މަސައްކަތަށް ބީލަންތައް ހުށަހެޅުމަށް ހުޅުވާލަން ހަމަޖެހިފައި ވަނީ އަންނަ މާޗު މަހުގެ 10 ވަނަ ދުވަހުގެ ހެނދުނު 11:00 ޖަހާ އިރު ފިނޭންސް މިނިސްޓްރީ ގައެވެ. މި ބީލަމުގައި ބައިވެރިވުމަށް ރަޖިސްޓްރީ ކުރުމަށް 1،500 ރުފިޔާ ނުވަތަ 100 ޑޮލަރުގެ ނަން-ރިފަންޑަބަލް ފީއެއް ދައްކަން ޖެހޭ ކަމަށް ފިނޭންސުން ބުނެއެވެ. އަދި މި ޕްރޮޖެކްޓުގެ ބިޑް ސެކިއުރިޓީގެ ގޮތުގައި 25،000 އެމެރިކާ ޑޮލަރު ނުވަތަ އެ އަދަދާ އެއްވަރު އަދަދެއްގެ ދިވެހި ރުފިޔާ ހުށަހަޅަން ޖެހެއެވެ.
ފިނޭންސް މިނިސްޓްރީން ބުނީ ބީލަމަށް ޝަރުތު ހަމަވާ ފަރާތެއް ކަނޑައަޅާނީ އިންޓަނޭޝަނަލް ކޮމްޕެޓިޓިވް ބިޑިންގެ އުސޫލުގެ މަތިން ކަމަށެވެ. އަދި އެކަން ކުރާނީ ވޯލްޑް ބޭންކް ގައިޑްލައިންސް އައިޑީއޭ ކްރެޑިޓް އަދި ހިލޭ އެހީގެ ދަށުން ގައުމުތަކުން ތަކެތި ހޯދުމާއި މަސައްކަތް ކުރާނެ ފަރާތެއް ހޯދުމަށް ތައްޔާރުކޮށްފައިވާ ރެގިއުލޭޝަނާ ވެސް އެއްގޮތަށް ކަމަށެވެ.
ހަލުވިކަމާއެކު މިވަގުތު ކޮވިޑް ފެތުރެމުންދާ އިރު ރާއްޖޭގެ ހުރިހާ ރަށެއްގައި ޕީސީއާރް ޓެސްޓު ހެދޭކަށް ނުހުރެއެވެ. އެހެންކަމުން ރަށްރަށުން ނަގާ ސާމްޕަލްތައް ޕީސީއާރް ޓެސްޓް ހެދޭ އިންތިޒާމް ހަމަޖެހިފައިވާ ރަށްރަށަށް ގެންގޮސްގެން އަންނަނީ ކޮވިޑް ޓެސްޓު ހަދަމުންނެވެ.
މިހާރު ދުވާލެއްގެ މައްޗަށް 7500 އެއްހާ ސާމްޕަލް ޓޭސްޓު ކުރަމުން އަންނަ އިރު 3000 އާ ގާތަށް ރާއްޛޭގައި އަންނަނީ ކޮވިޑަށް މީހުން ޕޮޒިޓިވް ވަމުންނެވެ.
