ރާއްޖޭގެ ގިނަ ބައެއްގެ މަގުބޫލުކަން ހޯދައިފައިވާ ލަވަކިޔުންތެރިޔާ، ޝަލަބީ އިބްރާހިމްގެ އާ ވީޑިއޯ ލަވައެއް ބެލުންތެރިންނާ ހަމައަށް ދޫކޮށްލައިފިއެވެ.
"ފަތްމިނި" ނަމަކަށް ކިޔާ މި ލަވައިގެ ޓީޒާއެއް މީގެ ކުރިން އާންމުކޮށްފާވީ ނަމަވެސް އެ ލަވައިގެ ކާސްޓުން ވަނީ ލަވަ ރިލީޒް ކުރުމާ ހަމައަށް ސިއްރު ކޮށްފައެވެ.
"ފަތްމިނި" ނަމަކަށް ކިޔާ މި ލަވަ ބެލުންތެރިންނާ ހަމައަށް ދޫކޮށްލައިފައިވަނީ މިއަދު މެންދުރުއެވެ. ކުޑަ ވަގުތުކޮޅެއްގެ ތެރޭގައި އެ ލަވައަށް ބޮޑު މަގުބޫލުކަމެއް ލިބިފައިވާއިރު އެ ލަވައިގެ ކާސްޓުންގެ ގޮތުގައި ފެނިގެންދަނީ ބެލުންތެރިންގެ މަގުބޫލުކަން ހޯދައިގައިވާ ޝަލަބީ އިބްރާހިމާއި އޭނާގެ އަންހެނުން ޝިފާ އިބްރާހިމެވެ.
މިއީ ޝަލަބީގެ އަމިއްލަ ރާގަކަށް ހަދައިފައިވާ ލަވައެކެވެ. ލަވައިގެ މިއުޒިކް އަދި މިކްސިން ހަދައިފައިވަނީ އިބްރާހިމް ޒައިޒު އަލީ (ކުޑަ އިއްބެ)ގެ ޓޮނިކް ލައިވް ސްޓޫޑިއޯއިންނެވެ. މި ހިތްގައިމު ލަވައިގެ ޑައިރެކްޓަކީ ހުސައިން މުނައްވަރު (ކުޑަފޫޅު) އެވެ.
ޝަލަބީ އެންމެ ފަހުން ނެރުނު ދެ ލަވަ، "ޝިކާރަ" އަދި "ލޯބިވާތީ"އަށް ވަނީ ބޮޑު މަގުބޫލުކަމެއް ލިބިފައެވެ.
