އައްޑޫ ސިޓީ މޮނިޓަރިންގައި އޮންނަތާ ތިން މަހަށް ވުރެ ގިނަ ދުވަސް ފަހުން މޮނިޓަރިންގެ ހާލަތުން ނަގައިފިއެވެ.
މޮނިޓަރިން ހާލަތުގައި އޮތް އެންމެ ގިނަ ދުވަސްވީ ރަށްތަކަކީ ސ. ހިތަދޫ، ސ. މަރަދޫ، ސ. މަރަދޫ ފޭދޫ އަދި ސ. ފޭދޫއެވެ. މި ރަށްތައް މޮނިޓަރިންގެ ހާލަތަށް ގެނެސްފައި ވަނީ މި ދިޔަ އޮގަސްޓް މަހުގެ 28 ވަނަ ދުވަހުއެވެ.
އަދި މި ދިޔަ ސެޕްޓެމްބަރު މަހު 4 ވަނަ ދުވަހު ސ. ހުޅުމީދޫ މޮނިޓަރިންގެ ހާލަތައް ވަނީ ގެނެސްފައެވެ.
އެޗްޕީއޭ އިން ބުނީ މޮނީޓަރިން ހާލަތު ދަމަހައްޓަންޖެހޭ ސަބަބެއް މިހާރު ނެތް ކަމަށާއި މޮނީޓަރިން ހާލަތާއި ގުޅިގެން އަޅާފައިވާ ފިޔަވަޅުތައް ވެސް ނިމުމަކަށް އައިސްފައިވާ ކަމަށެވެ.
އައްޑޫގެ މޮނީޓަރިންގެ ހާލަތު އުވާލި ނަމަވެސް އައްޑޫގައި ކޮވިޑްގެ 45 އެކްޓިވް ކޭސް އެބަ އުޅެއެވެ. މި ބަލީގައި އައްޑޫ އިން ވަނީ 12 މީހަކު މަރުވެފައިވާއިރު ހަތަރު މީހަކަށް ދަނީ ކޮވިޑް ފެސިލިޓީގައި ފަރުވާ ދެމުންނެވެ.
ރާއްޖޭގައި އަނެއްކާވެސް ކޮވިޑުގެ ކޭސްތައް މަތިވަމުން އަންނައިރު، ހާލަތު އެންމެ ގޯސްވެފައި ވަނީ ރަށްރަށުންނެވެ.
މިގޮތުން އިއްޔެ ޖުމްލަ 120 މީހަކު ކޮވިޑުން ޕޮޒިޓިވް ވެފައި ވާއިރު އޭގެ ތެރެއިން 44 މީހަކު ޕޮޒިޓިވްވީ ރަށްރަށުންނެވެ. މާލެއިން 49 މީހުން ޕޮޒިޓިވްވި އިރު ރިސޯޓުތަކުން 27 މީހަކު ވަނީ ޕޮޒިޓިވްވެފައެވެ.
މިއާއެކު މިހާތަނަށް 95،540 މީހުން ރާއްޖެއިން ޕޮޒިޓިވްވެފައިވާއިރު މިބަލިން 93،042 މީހުން ވަނީ ރަނގަޅުވެފައެވެ.
