މާލީގޮތުން ގައުމުގެ ހާލަތު ގޯސްވެ، އަފްގާނިސްތާނުގައި މަސައްކަތް ކުރާ ވޯލްޑް ބޭންކުގެ މުވައްޒަފުންތަކެއް ވަޒީފާއިން ވަކިކުރުމަށް ނިންމައިފިއެވެ.
އެގައުމުގެ މިނިސްޓްރީ އޮފް ރޫރަލް ރިހެބިލިޓޭޝަން އެންޑް ޑިވެލޮޕްމަންޓުން މި ކަން ނިންމާފައިވާ ކަމަށް ބައިނަލްއަގްވާމީ މީޑިއާތަކުން ރިޕޯޓު ކޮށްފައި ވާއިރު މާލީ ހާލަތު ތަންނުދިނުމުގެ ސަބަބުން ވަކި ކުރަން ނިންމާފައި ވަނީ ކިތައް މުވައްޒަފުން ކަމެއް ސާފެއް ނުވެއެވެ. ރިޕޯޓުތައް ބުނާ ގޮތުން ވޯލްޑްބޭންކުގެ ކޮންޓްރެކްޓް މުވައްޒަފުންގެ ގޮތުގައި 15 ހާހެއްހާ މީހުން އަފްގާނިސްތާނުގައި މަސައްކަތް ކުރެއެވެ.
ފާއިތުވި އޮގަސްޓް މަހުގެ 15 ވަނަ ދުވަހު، ތާލިބާން ހަނގުރާމަވެރިން އެ ގައުމުގެ ސަރުކާރު ހިންގުމާ ހަވާލުވުމާއެކު ވޯލްޑް ބޭންކު ހިމެނޭހެން ބައިނަލްއަގުވާމީ މުޖްތަމައުން ދެމުން އައި މާލީ އެހީތައް ހުއްޓާލުމުން ތަފާތު އެކި ސިނާއަތްތަކުގައި މަސައްކަތް ކުރާ މުވައްޒަފުންނަށް މުސާރަ ދިނުމަށް ސަރުކާރަށް ވަނީ ނުކުޅެދިފައެވެ.
މިއާއެކު އެގައުމުގެ އިގްތިސާދީ ހާލަތު ވަރަށް ބޮޑަށް ގޯސްވެގެން ދިއުމާ ގުޅިގެން އެގައުމުގެ ރައްޔިތުންނަށް އެހީތެރިވުމުގެ ގޮތުން ފަންޑެއް ގާއިމު ކުރުމަށް ދާދި ދަހުން ބޭއްވި އިސްލާމީ ގައުމުތަކުގެ ހާރިޖީ ވަޒީރުންގެ ބައްދަލުވުމުގައި ވަނީ ނިންމާފައެވެ.
މީގެ އިތުރުން އެމެރިކާ އިން ހިފަހައްޓާފައިވާ އެގައުމުގެ މުދާތަކާ ފައިސާތައް ދޫކޮށްލުމާ މެދު ގޮތެއް ނިންމުމަށް އދ. ގައި މަޝްވަރާ ކުރުމަށް ވެސް އިސްލާމީ ގައުމުތަކުން ނިންމާފައި ވެއެވެ.
އަފްޣާނިސްތާނުގެ އިގްތިސާދަށް ފޫނުބެއްދޭވަރުގެ ބޮޑެތި ގެއްލުންތަކެއް ލިބެމު ންދާއިރު މުސާރަ ނުދިނުމުގެ މައްސަލައާ ގުޅިގެން އެގައުމުގެ ބޮޑެތި ވިޔަފާރިތަކާ، ކާރުހާނާތައް އަދި ބައެއް މުހިއްމު މަރުކަޒުތައް ވަނީ ބަންދުކޮށްފައެވެ. އޭގެ ސަބަބުން އާންމުންނަށް ބޮޑެތި ދަތިތަކާ ކުރިމަތިލާން ޖެހިފައިވާ ކަމަށް އަފްޣާނުން ބުނެއެވެ.
މި މައްސަލަތަކުގެ އިތުރަށް އެގައުމަށް ހައިހޫނުކަމުގެ މަސައްލަވެސް ކުރިމަތި ވެފައިވާއިރު މިކަމާ ގުޅިގެން ޕާކިސްތާނުން ބުނެފައި ވަނީ މިހާރު އެންމެ އިސްކަމެއް ދީގެން ހައްލުކުރަން ޖެހިފައިވާ މައްސަލައަކީ ހައިހޫނުކަމުގެ މައްސަލަކަމަށެވެ. އަދި އެގައުމު އިންސާނީ ބޮޑު ކާރިސާއަކާ ދިމާއަށް މިސްރާބު ޖަހާފައިވާއިރު މި މައްސަލަ ހައްލު ނުކުރެވިއްޖެނަމަ އެގައުމުގައި ރެފިއުޖީންގެ މައްސަލަ ހައްލު ނުކުރެވޭ ވަރަށް ބޮޑުވެގެން ހިނގައިދާނެ ކަމަށެވެ.
