އެސްޓީއޯގެ 57 ވަނަ އަހަރީ ދުވަހާ ގުޅިގެން އެ ކުންފުނިން ސޭލެއް ފަށަން ތައްޔާރު ވެއްޖެއެވެ.
އެސްޓީއޯއިން ބުނީ މި ސޭލް އަކީ ހިތްގައިމު ގިނަ ޑިސްކައުންޓް ތަކެއް ކަސްޓަމަރުންނަށް ލިބިގެންދާނެ ހަމަ އެންމެ ދުވަހެއްގެ ސޭލް އެއް ކަމަށެވެ. މި ސޭލް ކުރިއަށް ގެންދިއުމަށް ހަމަޖެހިފާ ވަނީ މާދަމާ ކަމަށްވެސް އެ ކުންފުނިން ބުނެއެވެ.
މި ސޭލް ކުރިޔައް ދާނީ އެސްޓީއޯ ހޯމް އިމްޕްރޫވްމަންޓާއި އެސްޓީއޯ ސުޕަމާޓު އަދި އެސްޓީއޯ ރީޖަނަލް ފިހާރަތަކުން ކަމަށްވެސް އެސްޓީއޯއިން ބުނެއެވެ.
މި ސޭލްގައި އެސްޓީއޯގެ ފިހާރަތަކުން ލިބިގެންދާނެ ޑިސްކައުންޓް ތަކުގެ ތަފްސީލް ހިއްސާކުރަމުން އެސްޓީއޯއިން ބުނީ އެސްޓީއޯ ހޯމް އިމްޕްރޫވްމަންޓުން ގަންނަ އޭސީ ނޫން އެހެން ހުރިހާ މުދަލަކުން 15 ޕަސެންޓާ ހަމައަށް ޑިސްކައުންޓާ ލިބޭނެ ކަމަށާއި ސްޕަމާޓު ފިހާރައިން 5 ޕަސެންޓާ ހަމައަށް ޑިސްކައުންޓް ލިބޭނެ ކަމަށެވެ.
މީގެ އިތުރުން އެސްޓީއޯ ރީޖަނަލް ފިހާރަތަކުގެ ހޯމްއިމްޕްރޫވްމަންޓްގެ މުދަލުން 10 ޕަސެންޓް ޑިސްކައުންޓް ލިބޭނެ ކަމަށް އެސްޓީއޯއިން ބުނެއެވެ.
މި ސޭލްގައި ގްރޭންޑް ލަކީޑްރޯ ކުރިއަށް ގެންދަން ނިންމާފައި ވާއިރު ނަސީބު ވެރި އެއް ފަރާތަކަށް އެސްޓީއޯ ހޯމް އިމްޕްރޫވްމަންޓުން 20،000 ރުފިޔާގެ ވައުޗަރެއް ދިނުމަށް ވަނީ ހަމަޖެހިފައެވެ.
އެ ސޭލްގައި އެސްޓީއޯ ހޯމް އިމްޕްރޫވްމަންޓުން ކޮންމެ 57 ވަނަ ކަސްޓަމަރަކަށް ހާއްސަ އިނާމެއްގެ ގޮތުގައި ބައްތިރީސް އިންޗި ޓީވީއެއް ދިނުމަށް ހަމަޖެހިފައި ވާއިރު އެސްޓީއޯ ސުޕަމާޓުން ކޮންމެ 57 ވަނަ ކަސްޓަމަރެއްގެ ބިލު މުޅިން ހިލޭ ވާނެއެވެ.
