ދިވެހި އަދަބީބަސް ދިރުވާ އާލާކުރުމަށް އަމާޒުކޮށް އެސްޓީއޯގެ 2022ގެ ކަލަންޑަރު ނެރެފިއެވެ.
މި ކަލަންޑަރު ނެރުނީ އާޓިފިޝަލް ބީޗުގައި މިއަދު ހަވީރު ބޭއްވި ކުޑަކުދިންގެ ހަވީރެއްގައި އެސްޓީއޯގެ ސީއީއޯ އަދި މެނޭޖިން ޑިރެކްޓަރު ހުސެއިން އަމްރެވެ.
މި ހަފްލާގައި ވާހަކަ ދައްކަވަމުން އަމްރު ވިދާޅުވީ ދުނިޔޭގެ އެހެން ގައުމުތަކުގައި ބަސްތައް ބޭނުން ކުރާ އިރު އަދަބީ ބަސްތައް ބޭނުންކޮށް އުޅޭ ކަމަށާއި އެ ބަސްތަކަކީ ވަރަށް ގިނަ ބައެއްގެ ތަޖުރިބާތަކާއެކު އައިސްފައިވާ ބަސްތަކެއް ކަމަށެވެ.
ހަމައެހެންމެ 2022 ކަލަންޑަރު ފަރުމާ ކުރުމުގައި ދިވެހި އަދަބީ ބަސް އާލާކޮށް، ދިރުވުމަށް އިސްކަން ދީފައި ވަނީ ދިވެހިންގެ ތެރޭގައި ބޭނުންކުރާ މިސާލު ބަހާއި ހަރުބަސްތަކަކީ ވަރަށް ޒަމާނުއްސުރެ އައިސްފައިވާ ބަސްތަކެއް ނަމަވެސް, ދުނިޔެ ބަދަލުވެ ހިޔާލާއި އާ ކަންކަން އަންނަ އިރު, ހަރުބަހަކީ ވެސް އާ ވަމުން އަންނަ އެއްޗެއްގެ ގޮތުގައިވުން މުހިންމު ކަމަށް ދެކެވަޑައިގަންނަވާތީ ކަމަށެވެ.
އެސްޓީއޯ އިން އަންނަނީ ކޮންމެ އަހަރަކަށް ވެސް އެކުންފުނީގެ ހާއްސަ ކަލަންޑަރެއް ނެރެމުންނެވެ.
އެކުންފުނިން މިދިޔަ އަހަރުގެ ކަލަންޑަރު ހާއްސަކުރީ އެއްގަމާއި ކަނޑުގެ ދިރުންތައް ހިމާޔަތް ކުރުމާމެދު އާންމުން ހޭލުންތެރި ކުރުވުމަށެވެ.
