ރާއްޖޭގެ ފަތުރުވެރިކަމަށް 50 އަހަރު ފުރޭ މުނާސަބާއަށް ހާއްސަކޮށް، ކަނޑުގެ ދިރުންތައް ދައްކައިދޭ ގޮތަށް 2022 ގެ ކަލަންޑަރު އުރީދޫން މިއަދު ލޯންޗު ކޮށްފިއެވެ.
މިކަމަށްޓަކައި އުރީދޫގެ ހެޑް އޮފީހުގައި މިއަދު ބޭއްވި ރަސްމިއްޔާތުގައި މި ކަލަންޑަރު ލޯންޗުކޮށްދެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ.
އުރީދޫން ޕަބްލިސިޓީ ބިޔުރޯ އާ ގުޅިގެން ތައްޔާރުކުރި އެ ކަލަންޑަރަކީ އޯގްމެންޓަޑް ރިއަލިޓީކޮށް ކަނޑުގެ ދިރުންތައް ބަލާލެވޭ ގޮތަށް ތައްޔާރުކޮށްފައިވާ ކަލަންޑަރެކެވެ. އެގޮތުން ސްނެޕްޗެޓް އެޕް މެދުވެރިކޮށް ކަލަންޑަރުގައިވާ ކިއުއާރު ކޯޑު ސްކޭން ކޮށްލުމުން ކޮންމެ މަހަކަށް ހާއްސަ މޯޝަން ގްރެފިކްސް ފެންނާނެއެވެ.
މީގެ އިތުރުން، މި ކަލަންޑަރުގައިވާ. ކޮންމެ މަހަކަށް ހާއްސަކޮށް ތައްޔާރުކޮށްލެވޭ އޮރިގާމީ ކަރުދާހެއް ހިމަނާފައިވާއިރު، ކިއުއާރު ކޯޑު ސްކޭން ކޮށްލުމުން، ކޮންމެ މަހެއްގެ އޮރިގާމީ ހެދުމަށް އިރުޝާދުދޭ ވީޑިއޯއެއްވެސް އުރީދޫގެ ވެބްސައިޓުން ފެންނާނެއެވެ.
ކަލަންޑަރު ލޯންޗްކޮށްދެއްވުމަށް ފަހު ދެއްކެވި ވާހަކައިގައި މިނިސްޓަރު މައުސޫމް ވިދާޅުވީ، އުރީދޫން ރާއްޖެ ޕްރޮމޯޓް ކޮށްދިނުމަށްޓަކައި އެހީތެރިކަމެއް ފޯރުކޮށްދެއްމުންދާ ކަމަށާއި، އުރީދޫއަކީ ރާއްޖޭގެ ފަތުރުވެރިކަން ކުރިއެރުވުމަށް ކުރާ މަސައްކަތުގައި މުހިންމު ބައިވެރިއެއް ކަމަށެވެ.
އުރީދޫގެ ކަލަންޑަރާ ބެހޭ ގޮތުން ވާހަކަ ދައްކަވަމުން މިނިސްޓަރު ވިދާޅުވީ، މިއަދު މި ފެނުނީ "އާދަޔާ ހިލާފު" ކަލަންޑަރެއް ކަމަށާއި، "ކަލަންޑަރު ހުޅުވާލާފައި ކިއުއާރު ކޯޑު ސްކޭން ކޮށްލީމާ ދެން މި ދަނީ ރާއްޖޭގެ ކަނޑުއަޑީގެ ތަފާތު މަންޒަރުތަކެއްގެ ތެރެއަށް" ކަމަށެވެ.
އަންނަ އަހަރަށް ހާއްސަކޮށް އުރީދޫން ކަނޑުއަޑީގެ މަންޒަރުތައް ދައްކައިދޭ ކަލަންޑަރެއް ނެރުނުއިރު، މިއަހަރަށް ހާއްސަކޮށް ނެރުނު ކަލަންޑަރުގައިވެސް އޭއާރު ޓެކްނޮލޮޖީ ބޭނުންކޮށްފައިވެއެވެ.
