ހަތިމެއް އެއްލައެއް ނުލައި، ހެދީ ބެންޔާން ޓްރީއެއް، ބެލެނިވެރިޔާއަށް އޮޅުނީ!

ގއ. ކޮނޑޭ ސްކޫލްގެ އިންޑިޔާ ޓީޗަރަކު ހަތީމު ބިންމައްޗަށް އެއްލާލައި، ދަރިވަރުން ލައްވާ ކްރިސްމަސް ޓްރީ ހެދުވި ކަމަށް ބުނާ ހަބަރަކީ ދޮގު ހަބަރެއް ކަމަށް އެޑިއުކޭޝަން މިނިސްޓްރީން ބުނެފިއެވެ.

ކޮނޑޭ ސްކޫލްގެ ގުރޭޑް 4 އަދި 5 ގެ ދަރިވަރުންނަށް ކްރިއޭޓިވް އާޓް ގަޑީގައި ގްރުއާން ބިންމައްޗަށް އެއްލާލައި، ދަރިވަރުން ލައްވާ ކްރިސްމަސް ޓްރީ ހެދުވި ކަމަށް ބުނެ ބައެއް ނޫސްތަކުން ރިޕޯޓުކުރުމާ ގުޅިގެން ސޯޝަލް މީޑިއާގައި އެތައް ބަޔަކު ވަނީ ކަންބޮޑުވުން ފާޅުކޮށްފައެވެ.

"ދަ ޕްރެސް" އަށް މައުލޫމާތު ދެއްވަމުން އެޑިއުކޭޝަން މިނިސްޓްރީގެ ޕާމަނެންޓް ސެކެރެޓަރީ އަހްމަދު އަލީ ވިދާޅުވީ ގުރާން ބިންމައްޗަށް އެއްލާލައި އަދި ދަރިވަރުން ލައްވާ ކްރިސްމަސް ޓްރީ ހެދުވި ކަމަށް ބުނާ ވާހަކައަކީ ތެދު ހަބަރުތަކެއް ނޫން ކަމަށެވެ.

އަހްމަދު އަލީ ވިދާޅުވީ އެދުވަހު ކްރިއޭޓިވް އާޓް ގަޑީގައި ދަރިވަރުންނަށް ދަސްކޮށް ދިނީ ކަރުދާހުން އެއްޗެހި ހަދަން ކަމަށާއި އެކި ކުދިން އެކި އެެއްޗެހި ހެދި އިރު އޭގެ ތެރެއިން އެއް ކުއްޖަކު ބެންޔާން ޓްރީއެއް ހެދީ ކަމަށެވެ.

އަހްމަދު އަލީ އިތުރަށް ވިދާޅުވީ މޭޒުމަތީގައި ހުރި ފޮތްތަކެއް، އޭގެ ތެރޭގައި ހިސާބު ފޮތަކާއި އިސްލާމު ފޮތެއް ވެސް ވެއްޓުނު ކަމަށާއި ވެއްޓުމާ އެކު ޓީޗަރު އެ ފޮތްތައް ނަގާފައިވާ ކަމަށެވެ. އަދި އެ ފޮތްތަކުގެ ތެރޭގައި ގުރުއާން ނެތް ކަމަށް ވެސް އަހްމަދު އަލީ ވިދާޅުވިއެވެ.

ކުދިން ވެސް އެފޮތްތައް އެއްލާލި ވާހަކަ ނުބުނާ ކަމަށާއި ކުދިން ވެސް ބުނަނީ އެ ފޮތްތައް ވެއްޓުނީ ކަމަށެވެ.

އަހްމަދު އަލީ ވިދާޅުވީ އެމައްސަލަ ރިޕޯޓު ކޮށްފައި ވަނީ މީގެ ތިން ދުވަސް ކުރިން ކަމަށާއި އެދުވަހުން ފެށިގެން އެމައްސަލަ ވަރަށް ގާތުން ބައްލަވަމުން ގެންދަވާ ކަމަށެވެ.

އެ ޓީޗަރަކީ އެސްކޫލުގައި ކިޔަވައިދޭތާ ވަރަށް ގިނަ ދުވަސް ވެފައިވާ ރަނގަޅު ޓީޗަރެއް ކަމަށާއި މީގެ ކުރިން އެފަދަ އެއްވެސް މައްސަލައެއް އެޓީޗަރުގެ ފަރާތުން ފެނިފައި ނުވާ ކަމަށް އަހްމަދު އަލީ ވިދާޅުވިއެވެ.

ދިނާ ހިލާފް ވާހަކަތައް ދައްކާ، ދީނަށް ފުރައްސާރަ ކުރާ ބިދޭސީންގެ މައްސަލަތައް މީގެ ކުރިން ހުށަހަޅާފައި ވެއެވެ. އެގޮތުން ގުރުއާނަކީ އެއްވެސް ހަގީގަތެއް ނެތް ވާހަކަތަކެއް ހުރި ފޮތެއް ކަމަށާއި ގުރުއާނަކީ އުޑުން ވެއްޓުނު ފޮތެއް ނޫން ކަމަށް ވެސް އެ ޓީޗަރު ބުނެފައިވާ މައްސަލައެއް ހިމެނެއެވެ. އަދި ގުރުއާން ލިޔެފައި ވަނީ އިންސާނުން ކަމަށާއި އޭގައި އެ ހުރި ވާހަކަތަކަކީ ހިޔާލީ ވާހަކަތަކެއް ކަމަށް ވެސް އެ ޓީޗަރު ބުނެފައި ވެއެވެ.

މީގެ އިތުރުން ސ. އަތޮޅު މަދަރުސާގައި ގްރޭޑް 8 ގެ ދަރިވަރުންނަށް ކިޔަވައިދޭ އިންޑިއާ ޓީޗަރަކު އޭނާ ކްލާހުގައި ކިޔަވައިދެމުން "މިތް" އަކީ ކޮން އެއްޗެއްކަން ކުދިންނަށް ތަފްސީލް ކޮށްދިނުމަށް ވަނީ މަސައްކަތް ކޮށްފައެވެ. އެގޮތުން މިތް އަކީ ހަގީގަތެއް ނެތް ވާހަކަތައް ކަމަށާއި އެގޮތުން ކަލާނގެ ގޮތުގައި ގަބޫލުކުރާ ﷲ އަކީ މިތް އެއް ކަމަށް އެ ޓީޗަރު ވަނީ ބުނެފައި ކަމަށް ދަރިވަރަކު ކިޔައިދީފައި ވެއެވެ. އެމައްސަލާގައި ޓީޗަރު މިވަގުތު ހުރީ މަސްއޫލިއްޔަތުން އެކަހެރިކޮށް، ގޭގައި ބަހައްޓާފައެވެ.