ސިޔާސީ އިތުރު ދެ މަގާމެއް އުފައްދަވައި، ރައީސް އިބްރާހީމް މުހައްމަދު ސޯލިހު އެ މަގާމުތަކަށް ބޭފުޅުން ހަމަޖައްސަވައިފިއެވެ.
އެގޮތުން، ޔޫތު މިނިސްޓްރީގެ ސީނިއާ އެގްޒެކެޓިވް ޑިރެކްޓަރުގެ މަގާމަށް އަދާލަތު ޕާޓީގެ ކައުންސިލް މެމްބަރު ތޫބާ ރަޝީދު އައްޔަނު ކުރައްވާފައި ވާއިރު، ހެރިޓޭޖް މިނިސްޓްރީގެ ސީނިއާ އެގްޒެކެޓިވް ޑިރެކްޓަރުގެ މަގާމަށް އެމްއާރުއެމްގެ އަލީ ތޯއިފް ވަނީ އައްޔަނު ކުރައްވާފައެވެ.
އެ މަގާމުތަކަށް ތޫބާ އާއި ތޯއިފް އައްޔަނު ކުރައްވާފައި ވަނީ، ގާނޫނުއަސާސީގެ ދަށުން ރައީސަށް ލިބިބަޑައިގަންނަވާ ބާރުގެ ދަށުންނެވެ.
އެންމެ ފަހުން އޮތް ރައްޔިތުންގެ މަޖިލީހުގެ އިންތިހާބުގައި އަދާލަތު ޕާޓީގެ ފަރާތުން ވާދަކުރެއްވި ތޫބާ ވަނީ ކެލާ ދާއިރާއަށް ވާދަ ކުރައްވާފައެވެ. ނަމަވެސް އިންތިހާބަށް ކުޑަތަންވެފައި ވަނިކޮށް، އޭނާ ވަނީ ނަން އަނބުރާ ގެންދަވައި، އެމްޑީޕީގެ ފަރާތުން ވާދަކުރެއްވި ކެނޑިޑޭޓު، އިބްރާހީމް ޝަރީފަށް ތާއީދު ކުރައްވާފައެވެ.
އެގްޒެކެޓިވް ޑިރެކްޓަރުންނަށް މުސާރައާއި އިނާޔަތްތަކުގެ ގޮތުގައި ޖުމްލަ 25،000 ރުފިޔާ ލިބެއެވެ.
ނަމަވެސް ސިޔާސީ މަގާމުތައް މަދުކުރުމަކީ ރައީސް އިބްރާހީމް މުހައްމަދު ސޯލިހުގެ ވައުދުފުޅެކެވެ.
